मुंबई - ‘राजा रानीची गं जोडी’ या मालिकेत एक नवा अध्याय सुरू होणार आहे. काही महिन्यांपूर्वी रणजितने संजूकडून एक वचन घेतले होते, की ढालेपाटलांच्या दारात पुन्हाएकदा लाल दिव्याची गाडी यावी. आणि रणजीतचे हे स्वप्न पूर्ण करण्याची जबाबदारी संजूने घेतली होती. रणजीत आणि संजूमध्ये काही काळ दुरावा देखील आला पण तरीदेखील तिने धीर सोडला नाही. तिच्यासमोर एक ध्येय होते रणजीत यांना दिलेले वचन पूर्ण करणे.
आता संजू आणि रणजीतच्या आयुष्याला एक नवे वळण मिळाणार आहे. तिच्या या प्रवासात अनेक अडचणी आल्या तर काही आणल्या गेल्या. राजश्रीने घडवून आणलेल्या अडचणींवर देखील मात करत संजूची जिद्द, निर्धार तितकाच खंबीर राहिला. आणि आता तो दिवस आला आहे ज्याची प्रेक्षक आतुरतेने वाट बघत होते. संजू अखेर पोलीस वर्दीमध्ये रणजीत समोर येणार आणि अखेर रणजीतचे स्वप्न पूर्ण करणार आहे. ‘राजा रानीची गं जोडी’ मालिकेच्या विशेष भागात संजू म्हणजेच रणजीतच्या फौजदारीणबाईची धम्माकेदार एंट्री होणार आहे.
संजीवनी ढालेपाटील म्हणजेच शिवानी सोनार म्हणाली, “संजू आता एका नव्या रूपात प्रेक्षकांना दिसणार आहे. या प्रवासात खूप नव्या गोष्टी मला शिकायला मिळायला आहेत. पहिली गोष्ट म्हणजे मी एका दिवसात बुलेट चालवायला शिकले. मनिराजने खूप मदत केली बाईक शिकायला. संजूने पोलिस होणं हे माझ्यासाठी म्हणजेच शिवानीसाठी खूप जास्त जवळचं आहे. मला खूप भारी संधी मिळाली आहे असं मला वाटतं. कारण, माझे वडील पोलीस खात्यात काम करतात (बॅक ऑफिस – सीनियर हेड क्लार्क). जेव्हा मी पहिल्यांदा वर्दी घालून त्यांना व्हिडिओ कॉल केला तेव्हा काही सेंकदचा डेड पॉझ गेला आमच्यामध्ये. त्यांना झालेला आनंद बघून मला भरून आलं”.
‘राजा रानीची गं जोडी’ ही मालिका संध्या ७.०० वा. कलर्स मराठीवर प्रसारित होते.
