सध्या सर्व ठिकाणी वेब सिरीज चा बोलबाला आहे. हिंदीत अनेक नामचीन निर्माते, दिग्दर्शक, कलाकार वेब सिरीज कडे वळताना दिसताहेत. मराठीतही अनेक वेब सिरीज बनत असून आता ‘दुनियादारी’ फेम संजय जाधव एक सस्पेन्स थ्रिलर वेब सिरीज बनवतोय ज्याचे नाव आहे ‘अनुराधा’. याची निर्मिती प्लॅनेट मराठी'ची असून तिचे नुकतेच चित्रीकरण सुरु झाले. नजीकच्या काळात प्लॅनेट मराठी अनेक प्रोजेक्ट्स वर काम करीत असून ‘अनुराधा’ त्यातीलच एक आहे. त्यांची पहिली वेब फिल्म ‘जून’ या महिन्याच्या शेवटच्या दिवशी प्रदर्शित होत आहे.
संजय जाधव यांचे दिग्दर्शन असलेल्या ‘खारी बिस्कीट’ चित्रपटाला अनेक पुरस्कार प्राप्त झाले होते आणि ते आता वेब सिरीजचं दिग्दर्शन करण्यासाठी सज्ज झाले आहेत. संजय जाधव दिग्दर्शित ‘अनुराधा’ या वेबसिरीजमध्ये तेजस्विनी पंडित, सोनाली खरे, सचित पाटील, विद्याधर जोशी, सुशांत शेलार, सुकन्या कुलकर्णी अशी तगडी स्टारकास्ट पाहायला मिळणार आहे. सिनेसृष्टीला एकाहून एक सुपरहिट चित्रपट दिल्यानंतर संजय जाधव 'अनुराधा'च्या निमित्ताने प्रथमच वेबसिरीजचे दिग्दर्शन करत आहेत.
तेजस्विनी पंडित आणि संजय जाधव हे ‘ये रे ये रे पैसा’ वेळी एकत्र आले होते आणि आता ‘अनुराधा’ निमित्त पुन्हा एकत्र आल्याबद्दल संजय म्हणाला, 'एक सांगेन की, ही एक सस्पेन्स थ्रिलर असून माझ्या नेहमीच्या चौकटीबाहेर जाऊन प्रथमच काहीतरी वेगळं करण्याचा मी प्रयत्न केला आहे आणि मला एका गोष्टीचा विशेष आनंद आहे तो म्हणजे माझी पहिली वेबसिरीज 'प्लॅनेट मराठी' सारख्या ओटीटीवर प्रदर्शित होणार आहे. या वेबसिरीजबद्दल मी आता जास्त काही सांगणार नाही पण ती नक्कीच प्रेक्षकांना आवडेल याची खात्री आहे.’
''संजय नेहमीच वेगवेगळे, मनोरंजनात्मक विषय हाताळतो. त्यामुळे 'अनुराधा'ही प्रेक्षकांच्या नक्कीच पसंतीस उतरेल. संजय जाधव यांच्या अनेक चित्रपटांनी बॉक्स ऑफिसवर धुमाकूळ घातला आहे. संजयचे दिग्दर्शन, मराठी सिनेसृष्टीतील अतिशय मुरलेले कलाकार अशा सगळ्याच जमेच्या बाजू या वेबसिरीजमध्ये आहेत. 'प्लॅनेट मराठी ओटीटी', अ विस्टा मीडिया कॅपिटल कंपनी प्रेक्षकांना असाच दर्जेदार आशय देण्यासाठी नेहमीच बांधील राहील. संजय जाधव दिग्दर्शित 'अनुराधा' ही वेबसिरीज 'प्लॅनेट मराठी ओटीटी'वर प्रदर्शित होणार आहे, ही आमच्यासाठीही फार मोठी गोष्ट आहे.'' असे 'प्लॅनेट मराठी ओटीटीचे सीएमडी अक्षय बर्दापूरकर यांनी सांगितले.
संजय जाधव आपल्या पहिल्या वेब सिरीज बद्दल पुढे म्हणाला, 'अनुराधा' मधील माझी अभिनय-टीम उत्कृष्ट आहे आणि सर्वचजण आपल्याकडची वेगळी बाजू प्रेक्षकांसमोर आणतील. तेजस्विनीबद्दल सांगायचं झालं तर ती एक हरहुन्नरी अभिनेत्री आहे. यापूर्वीही मी तेजस्विनीसोबत अनेकदा काम केले आहे. कोणत्याही भूमिकेला योग्य न्याय देण्याची ताकद तिच्यात आहे. मुळात आम्हाला एकमेकांच्या कामाची पद्धत माहित असल्याने आमच्यात एक कम्फर्ट झोन तयार झाला आहे, ज्याने आमचं काम कारण सोप्प जातं आणि अतिशय सुरळीत पार पडतं.'
'प्लॅनेट मराठी ओटीटी' ने यापूर्वीच आपल्या आगामी वेबसिरीजच्या घोषणा केल्या आहेत. त्यात आता 'अनुराधा' या नव्याकोऱ्या वेबसिरीजची भर पडली असून या वेबसिरीजचा मुहूर्त नुकताच मुंबईत पार पडला.
हेही वाचा - 'माझा होशील ना' मध्ये दिसणार पिस्तूल आणि गोळीबार!
