स्टार प्रवाहवर सुरु असलेल्या मालिकांना प्रेक्षकांचा प्रचंड पाठिंबा मिळतोय. त्यांच्या अनेक मालिका ‘बार्क-टीआरपी’ तक्त्यात आघाडीवर आहेत. उत्तम आशय आणि दमदार सादरीकरण यामुळे स्टार प्रवाहच्या मालिका ‘टीआरपी’ रेसमध्ये आघाडीवर आहेत. आता ही वाहिनी एक ऐतिहासिक माईक घेऊन येतेय. ‘जय भवानी जय शिवाजी’ मालिकेत शिवरायांच्या शिलेदारांच्या शौर्यगाथा बघायला मिळणार असून यात एका शिलेदारांच्या भूमिकेत प्रसिद्ध अभिनेता अजिंक्य देव सुद्धा दिसणार आहे.
सुप्रसिद्ध अभिनेते अजिंक्य देव यांचं छोट्या पडद्यावर दमदार कमबॅक होतेय ‘जय भवानी जय शिवाजी’ या मालिकेतून ज्यात ते बाजीप्रभू देशपांडेच्या भूमिकेत दिसणार आहेत. प्रेक्षकांमध्ये ‘जय भवानी जय शिवाजी’ मालिकेची कमालीची उत्सुकता आहे. स्वराज्यासाठी जीवाची बाजी लावणाऱ्या छत्रपती शिवाजी महाराजांच्या शिलेदारांची शौर्यगाथा या मालिकेच्या रुपात उलगडणार आहे. बाजीप्रभू देशपांडे हे ऐतिहासिक पात्र साकारण्यासाठी अजिंक्य देव खुपच उत्सुक आहेत.
या भव्यदिव्य मालिकेविषयी सांगताना स्टार प्रवाहचे कार्यक्रम प्रमुख सतीश राजवाडे म्हणाले, ‘ स्टार प्रवाह वाहिनी नेहमीच मातीशी निगडीत आणि रुतलेल्या सशक्त कथा सादर करण्याचा प्रयत्न करत असते. शिवरायांची महती वर्णावी तेवढी थोडीच आहे. आकाश ठेंगणं पडेल असे छत्रपती शिवाजी महाराज यांचे कर्तृत्व आहे. राजा असावा तर असा. छत्रपती शिवाजी महाराज म्हणजे अखंड महाराष्ट्राचंच नव्हे तर आपल्या देशाचं आराध्य दैवत. महाराजांवर अनेक कथा, कादंबऱ्या, नाटक, मालिका आणि चित्रपट निर्माण झाले आहेत. यातून छत्रपती शिवाजी महाराजांची यशोगाथा आपण पाहिली आहे. या महान राजाच्या सेवेत अनेक रत्न होती ज्यांनी महाराजांच्या शब्दासाठी आपल्या देव देश आणि धर्मापायी प्राणांची आहुती दिली. अश्या शिलेदारांची गोष्ट सांगणारी मालिका ‘जय भवानी जय शिवाजी’ सादर करताना अभिमान वाटतो आहे. ही मालिका त्या सर्व शूरवीरांना अर्पण असेल. स्वराज्यासाठी लढलेल्या प्रत्येकालाच या मालिकेच्या निमित्ताने मानाचा मुजरा.’
या भूमिकेविषयी सांगताना अजिंक्य देव म्हणाले, ‘“स्टार प्रवाह सध्याची नंबर वन वाहिनी आहे. याआधी ‘प्रेमा तुझा रंग कसा’ या कार्यक्रमाच्या काही भागांचं मी सूत्रसंचालन केलं होतं. त्यामुळे पुन्हा एकदा स्टार प्रवाहसोबत या मालिकेच्या निमित्ताने काम करण्याचा योग आला आहे. माझ्या करिअरची सुरुवातच ‘सर्जा’ सिनेमातल्या ऐतिहासिक व्यक्तिरेखेने झाली होती. त्यामुळे बाजीप्रभू साकारताना प्रचंड आनंद होत आहे. बाजीप्रभूंच्या शौर्याच्या कथा आपण ऐकल्या आहेत, वाचल्या आहेत. पावनखिंडीमध्ये जीवाची बाजी लावत ते शेवटच्या श्वासापर्यंत लढले. अश्या या शूरवीराची भूमिका साकारायला मिळणं हे माझ्यासाठी नवं आव्हान असणार आहे.”
अजिंक्य देव पुढे म्हणाले, “या भूमिकेसाठीचा लूकही माझ्यासाठी नवा आहे. फिटनेसच्या बाबतीच मी नेहमीच जागरूक असतो. व्यायाम आणि खाण्यावरचं नियंत्रण यामुळेच मी फिट आहे. मी दररोज पाच ते सहा किलोमीटर धावतो. उत्तम आरोग्यासाठी हे सर्व गरजेचं आहे असं मला वाटतं. या सगळ्याचा उपयोग मला ‘जय भवानी जय शिवाजी’ मालिकेत बाजीप्रभू साकारताना होतो आहे.”
स्टार प्रवाह प्रस्तुत या मालिकेची निर्मिती दशमी क्रिएशन्सची असून ही नवी मालिका ‘जय भवानी जय शिवाजी’ २६ जुलैपासून रात्री १० वाजता स्टार प्रवाहवर प्रसारित होईल.
हेही वाचा - ‘रामायण’ मालिकेतील 'आर्य सुमंत' ज्येष्ठ अभिनेता चंद्रशेखर कालवश
