मुंबई - शेतकऱ्यांच्या प्रश्नावर प्रकाशझोत टाकत समाजातील वास्तव दाखवण्याचा प्रयत्न ‘फास’ या चित्रपटातून करण्यात आला आहे. हा चित्रपट शेतकरी आणि त्यांच्या जीवनशैलीकडे पाहण्याची नवी दृष्टी देणारा ठरणार आहे. सातत्यानं वाढणाऱ्या शेतकऱ्यांच्या आत्महत्या, निसर्गाचं असंतुलन व सरकारी धोरण यांचा शेतकरी व त्यांच्या कुटुंबांवर होणाऱ्या परिणामावर आधारलेली कथा 'फास'मध्ये पहायला मिळणार आहे. कानसह जापान आणि पॅरिस या परदेशांसोबतच राजस्थान व नोएडा या महत्त्वाच्या शहरांमधील सिनेमहोत्सवांमध्ये 'फास'चं खूप कौतुक करण्यात आलं आहे.
- " class="align-text-top noRightClick twitterSection" data="">
या चित्रपटातील छत्रपती शिवाजी महाराजांचा जयजयकार करणारे एक धडाकेबाज आणि अतिशय महत्त्वाचं गाणं नुकतंच प्रदर्शित करण्यात आलं आहे. शिवजयंतीच्या पार्श्वभूमीवर या गाण्याचा 'फास'मध्ये समावेश करण्यात आला आहे. 'जी जी रं जी जी...' असं म्हणत सुरू होणारं हे गाणं शिवजन्माचं वर्णन करणारं आहे. हे गाणं गीतकार अमोल देशमुख यांनी लिहिलं असून, संगीतकार ॲलन के. पी. यांनी अवधूत गुप्ते आणि शेख निशांत या गायकांच्या आवाजात ध्वनीमुद्रीत केलं आहे. 'शिवनेरीवर शिवशक्तीचं तेज जन्मलं आज...' असा या गाण्याचा मुखडा ऐकता क्षणीच स्मरणात राहणारा आहे. या गाण्यात महाराजांचा भगवा डौलानं फडकताना दिसतोच, पण शिवरायांची सुंदर मूर्तीही लक्ष वेधून घेते.
कमलेश सावंत या प्रमुख कलाकारावर हे गाणं चित्रीत करण्यात आलं आहे. गाण्याच्या सुरुवातीला खाकी वर्दीत राष्ट्रीय पारितोषिक विजेता अभिनेता उपेंद्र लिमयेही दिसतो. त्यानंतर गाणं सुरू होतं. ढोल-ताशांच्या निनादात छत्रपती शिवाजी महाराजांचे गोडवे गाणारं हे गाणं चित्रीत आणि ध्वनीमुद्रीत करण्यात आलं आहे. ढोल ताशांच्या जोडीला अस्सल मराठमोळं लेझीम नृत्यही यात आहे. या जोडीला तलवारबाजी, दांडपट्टा या साहसी खेळांसोबतच महाराष्ट्राची ओळख असलेली फुगडीही यात दिसते.
माँ एंटरटेनमेंट प्रस्तुत माहेश्वरी पाटील चाकूरकर निर्मित 'फास'ची निर्मिती नरेश पाटील, पल्लवी पालकर, दयानंद अवरादे, बसवराज पाटील, अनिल पाटील, वैशाली पद्देवाड यांनी मिळून केली आहे. अविनाश कोलते यांनी 'फास'चं दिग्दर्शन केलं आहे. यात उपेंद्र लिमये, सयाजी शिंदे, कमलेश सावंत, पल्लवी पालकर, गणेश चंदनशिवे, नामदेव पाटील, निलेश बडे, ज्ञानेश उंडगवकर, उमेश राजहंस, शरद काकडे, ईश्वर मोरे, पवन वैद्य, विनय जोशी, देवा पांडे, पूजा तायडे, तेजस्विनी, माधुरी भारती आणि श्रृतिका लोंढे यांच्या भूमिका आहेत. या चित्रपटाची कथा व संवादलेखन माहेश्वरी पाटील चाकूरकर यांनी केलं आहे, तर दिग्दर्शन करणाऱ्या अविनाश कोलते यांनीच पटकथालेखनही केलं आहे. रमणी रंजन दास या चित्रपटाचे सिनेमॅटोग्राफर आहेत, तर अपूर्वा मोतीवाले व आशिष म्हात्रे हे संकलक आहेत. कला दिग्दर्शनाची बाजू संतोष समुद्रे यांनी सांभाळली आहे.
जगभरातील परीक्षक आणि जाणकार रसिकांची कौतुकाची थाप मिळवत १३० पेक्षा अधिक पुरस्कार पटकावणारा 'फास' ४ फेब्रुवारी २०२२ रोजी सिनेमागृहांमध्ये प्रदर्शित होणार आहे.
हेही वाचा - पाहा, डान्स 'गुरु'सोबत मुलायम थिरकताना टायगर श्रॉफचा व्हिडिओ
