कुल्लू - महानायक अमिताभ बच्चन यांनी उन्हाळ्याच्या सुट्ट्यांची आत्तापासूनच तयारी सुरू केली आहे. पत्नी जया सोबत सुट्टी घालवण्यासाठी बिग बींनी मनाली येथील एका पंचतारांकित रिसॉर्टमध्ये एक कॉटेज बुक करून ठेवले आहे.
मागील आठवड्यात 'ब्रह्मास्त्र' या चित्रपटाच्या चित्रीकरणासाठी अमिताभ बच्चन मनालीमध्ये होते. हिमाचल प्रदेश सरकारच्या सरकारी विश्रामगृहात ते वास्तव्याला होते. या दरम्यान त्यांनी आपल्या ट्विटर, ब्लॉग आणि इंस्टाग्राम अकाऊंटवर कुल्लू आणि मनालीची भरभरून स्तुती केली आणि फोटोही अपलोड केले आहेत. त्यामुळे अमिताभ बच्चन हिमाचल प्रदेश सरकारचे अघोषित ब्रँड अॅम्बॅसडरचे काम केले असल्याची चर्चा आहे.
सोशल मीडियावर बिग बींचे 10 कोटींपेक्षा जास्त फॉलोअर आहेत. यात अनेक बॉलीवुड आणि हॉलीवुड क्षेत्रातील लोकांचाही समावेश आहे. हिमाचल येथील मुक्कामाच्या शेवटच्या दिवशी त्यांनी डोक्यावर कुल्लूची ओळख असलेली टोपी घालून फोटो सोशल मीडियावर शेअर केला. सोबतच हिमाचलमधील संस्कृती, वेशभूषा आणि वातावरणाची स्तुतीही केली.
अमिताभ बच्चन यांच्यामुळे मनाली जगभरात चर्चेत आली आहे. या अगोदर माजी पंतप्रधान पंडित जवाहर लाल नेहरू आणि अटल बिहारी वाजपेयी यांनी हे काम केले होते, अशा माहिती इतिहासकार छेरिंग दोरजे यांनी दिली.
