मुंबई - ऋषी कपूर सध्या न्यूयॉर्कमध्ये कॅन्सरचा उपचार घेत आहेत. अजून काही महिने त्यांच्यावर उपचार सुरू राहणार आहेत. भारतातून अमेरिकेत गेलेले अनेक कलाकार ऋषी यांची भेट घेत सोशल मीडियावर फोटो शेअर करत असतात. आता अभिनेता शाहरूखनेही ऋषी कपूर आणि नीतू कपूर यांची भेट घेतली आहे.
आपल्यामुळे कोणालातरी आनंद देणं ही एक दुर्मिळ गुणवत्ता आहे. ही गुणवत्ता आणि काळजी शाहरूखकडे आहे. त्याच्या कामाशिवाय एक उत्तम माणूस म्हणून मी त्याची प्रशंसा करते, असे कॅप्शन देत नीतू कपूर यांनी शाहरूख आणि ऋषी कपूरसोबतचा आपला फोटो शेअर केला आहे.
ऋषी कपूर गेल्या काही महिन्यांपासून न्यूयॉर्कमध्ये उपचार घेत असले, तरी नेमकं कोणत्या आजारावर ते उपचार घेत आहेत याबद्दल कोणतीही माहिती कपूर कुटुंबीयांनी दिली नव्हती. यासोबतच ऋषी यांना कॅन्सर असल्याचे वृत्तही त्यांनी फेटाळून लावले होते. अशात नुकतंच राहुल रवैल यांनी ऋषी कपूर कॅन्सरमुक्त झाल्याची माहिती सोशल मीडियावरून दिली आहे.
