मुंबई - भारतामध्ये कोविडच्या दुसऱ्या लाटेमुळे हाहाःकार माजला आहे. कोरोना रुग्णसंख्या वाढत असतांना वैद्यकीय सेवा कमी पडत आहेत. तसेच लॉकडाऊनमुळे भारतासह संपूर्ण जगाचीही आर्थिक घडी बिघडली आहे. अनेक ठिकाणी ऑक्सिजन आणि औषधांचा तुटवडा जाणवत आहे. सामान्य माणसाला हा खर्च परवडत नाही. परंतु आपल्या समाजात सामाजिक बांधिलकी जपणारे सेलिब्रिटी सुद्धा आहेत. यातच टीव्ही आणि सिनेस्टार मौनी रॉयसुद्धा मदत करण्यासाठी पुढे सरसावली आहे.
सोशल मीडियाचा अवलंब
मौनी रॉय अशा काही अभिनेत्रींपैकी एक आहे, जिने नेहमीच उदात्त कामांना साथ दिली आहे. या भीषण रोगाच्या वेळी देखील मौनी आपल्या देशातील नागरिकांना शक्य तितकी मदत करत आहे. पश्चिम बंगाल येथील इस्कॉन फाउंडेशनचे प्रमुख स्थान मायापूर वैद्यकीय सुविधांच्या अभावामुळे, कसे पीडित आहे? याविषयी माहिती सामायिक करण्यासाठी ती आता सोशल मीडियाचा अवलंब करत आहे. आजूबाजूच्या परिसरातील तसेच झोपडपट्टीतील रुग्णालये, ऑक्सिजन सिलेंडर, ऑन कॉल डॉक्टर आणि संबंधित वैद्यकीय साहित्याचा अभाव यामुळे तेथील जनता त्रस्त आहे. इस्कॉन फाउंडेशन मायापुर मध्ये एक वैद्यकीय सुविधा उभारत आहे. ज्यामुळे कोविड-१९ काळात पीडित लोकांना योग्य वैद्यकीय सहाय्य मिळण्यास मदत होईल. मौनी रॉयने या उदात्त कारणासाठी तिच्या क्षमतेनुसार इस्कॉन फाउंडेशनला देणगी दिली आहे.
'प्रत्येकाने एकमेकांना शक्य तेव्हडी मदत करणे प्रत्येकाचे मूलभूत कर्तव्य आहे'
या कोविड-१९ संक्रमण काळात गरजूंना मदत करण्याच्या प्रयत्नात मौनी रॉयने अलीकडेच गीव्ह इंडिया फाऊंडेशनला देणगी दिली. मौनी रॉयने याबद्दलचा एक व्हिडिओ आपल्या सोशल मीडिया हॅण्डल अकाऊंटवर शेअर केला आहे. आपल्या व्हिडिओमध्ये मौनी रॉयने आपल्या चाहत्यांना आणि अनुयायांना हा संदेश इतरांपर्यंत पोहोचवण्यासाठी मदत करण्याची विनंती केली आहे. तसेच इस्कॉन फाउंडेशनला देणगी देण्यासाठीसुद्धा विनंती केली आहे. तिला खात्री आहे की, याने लोकांमध्ये जागरुकता निर्माण होईल. या उदात्त हेतूसाठी जितके लोक पुढे येतील आणि दान करतील, तितकाच या प्राणघातक आजाराने ग्रस्त लोकांना कोरोनाशी संघर्ष करण्यासाठी मदत होईल. मौनी रॉय पुढे असेही म्हणते की, माणूस म्हणून या महामारीच्या कठीण समयी प्रत्येकाने एकमेकांना शक्य तेव्हडी मदत करणे प्रत्येकाचे मूलभूत कर्तव्य आहे.
हेही वाचा - 'अ‌‌ॅलोपॅथीबाबतचे वक्तव्य मागे घेतो; भावना दुखावल्या असतील तर दिलगिरी' - बाबा रामदेव
