रणवीर-आलियाच्या 'प्रेमकहानी'त धर्मेंद्र, जया बच्चन आणि शबाना आझमीची एन्ट्री

करण जोहर आणि रोमँटिक चित्रपट हे जोडीदार आहेत आणि त्याचा आगामी ‘रॉकी और रानी की प्रेम कहानी’ नावाप्रमाणेच प्रेमकहाणी तर आहेच परंतु त्यात इतर भावनांचे अनोखे मिश्रण असणार आहे. या चित्रपटात रणवीर सिंग व आलिया भट्ट यांची नावे आधीच जाहीर झाली होती आता त्याच्यासोबत असणार आहेत धर्मेंद्र, जया बच्चन आणि शबाना आझमी यांच्यासारख्या तगड्या कलाकारांची फौज.

‘जो भी करनेका, वो स्टाईल में करनेका’ या उक्तीप्रमाणे वागणाऱ्या करण जोहरने तो दिग्दर्शन ‘मिस’ करतोय असे सांगितले होते. आता करण जोहर तब्बल पाच वर्षांनंतर दिग्दर्शकाची टोपी डोक्यावर चढवत आहे. ‘ऐ दिल हैं मुश्किल’ हा त्याने दिग्दर्शित केलेला चित्रपट प्रदर्शित होऊन ५ वर्षे उलटून गेली आहेत. परंतु इतका काळ निर्मितीत अडकलेला करण चित्रपट दिग्दर्शनापासून फार काळ लांब राहू शकत नाहीये. करण जोहर आणि रोमँटिक चित्रपट हे जोडीदार आहेत आणि त्याचा आगामी ‘रॉकी और रानी की प्रेम कहानी’ नावाप्रमाणेच प्रेमकहाणी तर आहेच परंतु त्यात इतर भावनांचे अनोखे मिश्रण असणार आहे. या चित्रपटात रणवीर सिंग व आलिया भट्ट यांची नावे आधीच जाहीर झाली होती आता त्याच्यासोबत असणार आहेत धर्मेंद्र, जया बच्चन आणि शबाना आझमी सारखे तगडे कलाकारसुद्धा.

‘गुड्डी’, ‘चुपके चुपके, ‘शोले’ सारख्या चित्रपटांतून एकत्र चमकलेले धर्मेंद्र आणि जया बच्चन रणवीर सिंगच्या पालकांच्या भूमिकेत दिसणार आहेत. ते पहिल्यांदाच जोडीने दिसणार असून आधी ते सिनेमांत एकत्र असले तरी एकमेकांसोबत नव्हते. त्यामुळे त्या दोघांसाठी हा चित्रपट स्पेशल असेल. तसेच नेहमीच आशयघन चित्रपट करणारी शबाना आझमी आलिया भटच्या आईच्या भूमिकेत असणार आहे. शबानाचा रोल तगडा असणारच कारण अन्यथा तिने हा चित्रपट स्वीकारलाच नसता. एकंदरीत ‘रॉकी और रानी की प्रेम कहानी’ मध्ये अभिनयाची जुगलबंदी बघायला मिळेल हे नक्की.

रणवीर सिंग, आलिया भट्ट, धर्मेंद्र, जया बच्चन आणि शबाना आझमी सारखी टॅलेंटेड टीम सोबत नवीन चित्रपट ’रॉकी और रानी की प्रेम कहानी’ करण जोहर घेऊन येत असून त्याची घोषणा त्याने त्याचा लाडका कलाकार रणवीर सिंग च्या वाढदिवशी केली हे विशेष. तब्बल ५ वर्षानंतर करण जोहर ने दिग्दर्शनाची सूत्रे हाती घेतली आहेत. आज आपल्या सोशल मीडिया अकाउंट वरून करण जोहर ने नवीन चित्रपटाच्या घोषणेसह या चित्रपटात रणवीर सिंग, आलिया भट्ट, धर्मेंद्र, जया बच्चन आणि शबाना आझमी मुख्य भूमिकेत असल्याची माहिती दिली आहे. ह्या चित्रपटाच्या निमित्ताने ही भरभक्कम कलाकारांची टीम पडद्यावर एकत्रित दिसणार आहे.

करण जोहर दिग्दर्शित, हिरू यश जोहर, करण जोहर आणि अपूर्व मेहता द्वारा निर्मित या चित्रपटाचा स्टुडिओ पार्टनर Viacom18 आहे. या चित्रपटाचे संवाद इशिता मोइत्रा यांचे असून कथा इशिता मोइत्रा, शशांक खेतान आणि सुमित रॉय यांनी लिहिलेली आहे.

करण जोहर निर्मित आणि दिग्दर्शित ’रॉकी और रानी की प्रेम कहानी’ चे चित्रीकरण लवकरच सुरु होणार असून हा चित्रपट २०२२ मध्ये प्रदर्शित होईल अशी ग्वाही करण जोहर ने दिली आहे.
हेही वाचा - सिनेसृष्टीतील समस्या घेऊन कलाकार कृष्णकुंजवर, नव्या संघटनेच्या निर्मितीची घोषणा