काबूल - अफगाणिस्तान तालिबानच्या हाती गेले असून तिथे अराजकता पसरली आहे. गेल्या गुरुवारी काबूल विमानतळाबाहेर स्फोट झाला. यात जवळपास 100 जणांचा मृत्यू झाला आहे. मात्र, लोक जिवाची पर्वा न करता पुन्हा विमानतळावर गर्दी करत आहेत. लोकांमध्ये मृत्यूपेक्षा तालिबान्यांची भीती जास्त दिसून येत आहे. प्रत्येक जण मिळेल त्या मार्गाने देश सोडण्याचा प्रयत्न करत आहे. अमेरिकेची निर्वासन मोहीम 31 ऑगस्टला संपणार असून यासाठी काहीच दिवस शिल्लक राहिले आहेत. अमेरिकेकडून आपले निर्वासन होईल, अशी आशा नागरिकांना असून ते विमानतळाबाहेर गर्दी करत आहेत.
नागरिक विमानतळाबाहेर गर्दी करत असल्याचे दहशतवादी हल्ल्याची शक्यता आणखी वाढली आहे. विमानतळावर पुन्हा एकदा हल्ला होऊ शकतो, असे गुप्तचर संस्थाकडून सांगण्यात येत असल्याची माहिती आहे. यासाठी नागरिकांनी विमानतळाबाहेर गर्दी करू नये, असे आवाहन अमेरिकन सैन्याने केले आहे. मात्र, अफगाणिस्तान सोडण्यासाठी काबूल विमानतळ हाच एकमेव मार्ग असल्याने नागरिक आपल्या कागदपत्रांसह विमानतळाबाहेर जमा होत आहेत.
विमानतळाबाहेर होणाऱ्या गर्दीचा फायदा घेत इस्लामिक स्टेट खुरासानने दोन आत्मघातकी बॉम्बस्फोट घडवले. यात 169 अफगाण नागरिक आणि अमेरिकेच्या 13 सैनिकांचे प्राण गेले आहेत. अमेरिकेने आपल्या सैनिकांच्या मृत्यूचा 48 तासांच्या आत बदला घेतला आहे. अफगाणिस्तानच्या पूर्वेकडील नंगरहार येथे ISIS-K चं तळ आहे. या तळावर अमेरिकेन सैन्याने ड्रोनद्वारे हल्ला केला. लक्ष्य प्राप्त केले असून या मिशिनमध्ये कोणत्याही सामान्य नागरिकाची हानी झाली नाही, असे यूएस सेंट्रल कमांडचे प्रवक्ते कॅप्टन बिल अर्बन यांनी सांगितले.
31 ऑगस्टपर्यंत निर्वासन पूर्ण करण्यावर अमेरिकेचा फोकस -
अमेरिकन नागिरकांना बाहेर काढण्यासाठी अमेरिकेचे प्रयत्न सुरू आहेत. 31 ऑगस्ट पर्यंत निर्वासन पूर्ण करण्यावर अमेरिकेने लक्ष केंद्रीत केले आहे. गेल्या एप्रिलमध्ये राष्ट्रध्यक्ष जो बायडेन यांनी अमेरिकन सैन्य मागे घेण्याची अंतिम मुदत निश्चित केली होती. जी आधी सप्टेंबर होती. परंतु नंतर ती 31 ऑगस्ट करण्यात आली. निर्वासन मोहीमेची शेवटची तारिख जवळ येत आहे, तसे दिवसेंदिवस संकट वाढत चालले आहे, असे व्हाईट हाऊसच्या प्रेस सेक्रेटरी जेन सासाकी यांनी म्हटलं.
105,000 जणांना बाहेर काढले -
तालिबानवर अमेरिकाचा विश्वास नाही. मात्र, तालिबान्यांनी संपूर्ण अफगाणिस्तानरव ताबा मिळवला आहे. त्यामुळे निर्वासन मोहीम पूर्ण करण्यासाठी आणि तेथून नागरिकांना सुरक्षित बाहेर काढण्यासाठी तालिबान्यांसोबत चर्चा सुरू ठेवणे गरजेचे आहे, असे व्हाईट हाऊसच्या प्रेस सेक्रेटरी जेन सासाकी यांनी सांगितले. तसेच आतापर्यंत अमेरिकेने 105,000 जणांना अफगाणिस्तानमधून बाहेर काढल्याची माहिती त्यांनी दिली.
हेही वाचा - 48 तासांच्या आत सैनिकांच्या मृत्यूचा अमेरिकेने घेतला बदला; उडवली ISIS-K ची ठिकाणं
हेही वाचा - Explainer: काबूल विमानतळावर हल्ला करणारी IS-K संघटना आहे तरी काय? जाणून घ्या...
