जिनिव्हा - संपूर्ण जगाला कोरोनावरील लसीचा पुरवठा होईपर्यंत शांत बसणार नाही, असे वक्तव्य जागतिक आरोग्य संघटनेचे महासंचालक टेड्रोस घेब्रायसस यांनी केले आहे. जगातील सर्व देशांना लस मिळेपर्यंत जागतिक आरोग्य संघटना अविरत कार्यरत राहील, असेही त्यांनी म्हटले. चीनमध्ये कोरोनाचा विषाणू सापडल्याचे वैज्ञानिकांनी सर्वात प्रथम जागतिक आरोग्य संघटनेला सांगितले होते. या घटनेची वर्षपूर्ती झाली. त्या निमित्ताने आयोजित केलेल्या परिषदेत डब्ल्यूएचओचे महासंचालक बोलत होते.
वैज्ञानिकांची एक वर्षाच्या आत मोठी कामगिरी -
एक वर्षाच्या आत कोरोनावरील लस तयार होऊन जगभरात पुरवठाही सुरू झाला आहे. ही खुप मोठी वैज्ञानिक कामगिरी असल्याचे टेड्रोस घेब्रायसस म्हणाले. कोरोना संपवण्यासाठीचे प्रयत्न सर्वोत्तम आहेत. मात्र, जोपर्यंत सर्व देशांना लस मिळत नाही, तोपर्यंत शांत बसणार नसल्याचे ते म्हणाले.
युरोप, अमेरिका इंग्लडसह अनेक देशांनी आणीबाणीच्या काळातील वापरासाठी कोरोनाच्या लसीला परवानगी दिली आहे. यामध्ये फायजर आणि बायोएनटेक कंपनीने तयार केलेल्या लसीचा समावेश आहे. आरोग्य कर्मचारी आणि संवेदनशील लोकसंख्येच लसीकरण या देशांत आता सुरू झाले आहे. २०२१ साली कोरोनाविरोधात लढताना नवी आव्हानं उभी राहू शकतात, असा इशारा आरोग्य संघटनेच्या महासंचालकांनी दिला आहे.
२०२१ वर्षात नव्या आव्हानांचा सामना -
कोरोना विषाणूने सर्वांना आधीच जेरीस आणले असताना आणखी एक चिंता वाढवणारी बातमी आली आहे. ब्रिटनवरून प्रवास करून भारतात आलेल्या सहा प्रवांशांना नव्या कोरोना विषाणूची लागण झाल्याचे चाचणीत स्पष्ट झाले आहे. बंगळुरू, पुणे आणि हैदराबाद शहरातील प्रयोगशाळेत सहा जणांना नव्या कोरोनाची लागण झाल्याचे स्पष्ट झाले आहे.
सरकारी विलगीकरणगृहात सहा रुग्णांवर निगराणी -
बंगळुरुमधील NIMHANS या प्रयोगशाळेत तीन नमुने, हैदराबादमधील सेंटर फॉर सेल्युलस अ‌ॅन्ड मॉलॅक्युलर बायोलाजी प्रयोगशाळेत दोन नमुने आणि पुण्यातील नॅशनल इन्स्टिट्यूट ऑफ व्हायरॉलॉजी प्रयोगशाळेत तपाणीसाठी पाठवलेला एक नमुन्यात नव्या कोरोनाचे विषाणू सापडले आहेत. या सर्व सहा रुग्णांना सरकारी आरोग्य सुविधेत अलगीकरणात ठेवण्यात आले आहे. या कोरोना पॉझिटिव्ह रुग्णांच्या संपर्कात आलेल्या सर्वांना क्वारंटाईन करण्यात आले आहे. तसेच संपर्कात आलेल्या आणखी व्यक्तींचा शोध घेण्यात येत आहे. ब्रिटनहून येताना विमानातील सहप्रवाशांचाही शोध घेण्यात येत आहे.
