वॉशिंग्टन डी.सी - अमेरिकेत बायडेन पर्वाला सुरुवात झाली आहे. जो बायडेन यांनी अमेरिकेचे 46 वे राष्ट्राध्यक्ष म्हणून शपथ घेतली. बायडन यांच्या मंत्रिमंडळात विविध घटकांना प्रतिनिधीत्व देण्यात आले आहे. त्यांच्या कॅबिनेट मंत्रीमंडळामध्ये 38 वर्षीय पीट बटइग यांची निवड झाली आहे. बायडेन यांच्या क‌ॅबिनेटमधील ते पहिले एलजीबीटीक्यू सदस्य बनले आहेत. तसेच व्हाईट हाऊसच्या मंत्रीमंडळामधील ते पहिले समलैंगिक सदस्य बनले आहेत.
पीट बटइग यांची अमेरिकेच्या सिनेटमध्ये परिवहन सचिव पदी नियुक्ती करण्यासाठी मतदान घेण्यात आले. यावेळी त्यांच्या बाजूने 86 तर विरोधात 13 मते पडली. ते 19 वे परिवहन सचिव आणि राष्ट्रपती जो बायडेन यांच्या मंत्रीमंडळातील पाचवे सदस्य आहेत. सीनेटद्वारे त्यांच्या नावाची औपचारीक घोषणा अद्याप बाकी आहे.
आपण समलैंगिक असल्याचा सार्वजनिकरित्या खुलासा करणारे ते अमेरिकेच्या इतिहासामधील पहिलेच नेते ठरले आहेत. बटइग हे इंडियानातील होमटाऊन साऊथ बँड शहराचे माजी महामौर आहेत. पीट बटइग हे स्टेट प्रायमरी किंवा कॉकसची निवडणूक जिंकणाऱ्या सर्वात युवा नेत्यांपैकी एक आहेत.
ऐतिहासिक निवडणूक -
2020 ची अमेरिकेच्या राष्ट्राध्यक्षपदाची निवडणूक अनेक अर्थांनी ऐतिहासिक समजली जात होती. कोरोनाचा प्रसार झाल्यानंतर जागतिक समीकरणे बदलली आहेत. जगात चीनचा प्रभाव वाढत असतानाच कोरोनाचा प्रसार झाला. तसेच महामारीमुळे सर्वात जास्त मृत्यू अमेरिकेत झाले. अर्थव्यवस्थाही रसातळाला गेली. अशा परिस्थितीत अमेरिकेची सत्ता कोणाच्या हातात जाणार याची उत्सुकता सर्वांना लागली होती. यात बायडेन यांनी बाजी मारली आहे.
