टांझानिया - आफ्रिकेतील सर्वात उंच शिखर माऊंट किलिमांजारो येथे भीषण आग लागली आहे. येथे 500 स्वयंसेवक आग विझवण्याचा प्रयत्न करत आहेत. काही मैल अंतरावरूनही या आगीचे लोळ दिसत आहेत, असे टांझानियाच्या अधिकाऱ्यांनी सांगितले. हा पर्वत गिर्यारोहकांमध्ये लोकप्रिय आहे.
येथे 500 स्वयंसेवक कार्यरत असून त्यांना आगीचा फैलाव मर्यादित ठेवण्यात यश आले आहे, अशी माहिती टांझानिया राष्ट्रीय उद्यानाचे प्रवक्ते पास्कल शेलुटेटे यांनी दिली. आगीचे कारण अद्याप समजू शकलेले नाही, असे त्यांनी सांगितले. अजूनही जळत असलेल्या भागाला 'किफुनिका हिल' म्हणून ओळखले जाते, असे उद्यानातर्फे दिलेल्या निवेदनात म्हटले आहे.
दिवसभरापेक्षा जास्त काळ जळत असलेल्या आगीचा वन्यजीव किंवा वनस्पतींवर काय परिणाम झाला आहे, हे शेलुटेटे यांनी सांगितले नाही. परंतु, त्यांनी पर्यटकांच्या सुरक्षेची ग्वाही दिली. माऊंट किलिमांजारो हा जगातील सर्वात उंच सरळ उभा असलेला पर्वत आहे. त्याची उंची 19 हजार 443 फूट आहे.
हेही वाचा - ओसामा बिन लादेनच्या माजी प्रवक्त्याने केली ब्रिटनमध्ये परतण्याची तयारी
