वॉशिंग्टन डी. सी. - जगभरात कोरोनाचा कहर पाहायला मिळत आहे. कोरोनावर मात करण्यासाठी जगभरामध्ये युद्ध पातळीवर प्रयत्न करण्यात येत आहेत. जगभरामध्ये आतापर्यंत 5 लाख 626 जणांचा कोरोनामुळे मृत्यू झाला आहे. त्यामुळे अधिक चिंता व्यक्त करण्यात येत आहे.
तब्बल 180पेक्षा जास्त देशांमध्ये कोरोनाचे रुग्ण आढळून आले आहेत. कोरोनावर मात करण्यासाठी आरोग्य यंत्रणेकडून विविध उपाययोजना राबवण्यात येत असून, आतापर्यंत 54 लाख 53 हजार 247 जण कोरोनामुक्त झाले आहेत. तर 5 लाख 626 जणांचा कोरोनामुळे मृत्यू झाला आहे. तसेच एकूण कोरोनाबाधितांची संख्या 1 कोटी 75 हजार 111वर पोहचली आहे. कोरोना रुग्णांची संख्या दिवसेंदिवस वाढतच असून, चिंताजनक परिस्थिती निर्माण झाली आहे.
कोरोना विषाणूची सुरुवात मध्य चीनमधील वुहान प्रांतातून झाली होती. त्यानंतर हा विषाणू झपाट्यानं जगभरात पसरत होता. चीनमध्ये हा विषाणू मोठ्या प्रमाणात आटोक्यात आला. चीनमध्ये गेल्या 24 तासांत फक्त 17 नवे रुग्ण आढळले आहेत. चीनमध्ये एकूण 4 हजार 634 जणांचा मृत्यू तर 83 हजार 500 कोरोनाबाधित रुग्ण आढळले आहेत.
कोरोनाचा सर्वाधिक फटका अमेरिकेला बसला आहे. अमेरिकेत जवळपास 25 लाख 96 हजार 533 जणांना करोनाचा संसर्ग झाला आहे. तर 1 लाख 28 हजार 152 जणांचा बळी गेला आहे. अमेरिकेनंतर ब्राझीलमध्ये 13 लाख 15 हजार 941 जणांना कोरोनाची बाधा झाली आहे. तर 57 हजार 103 जणांचा आतापर्यंत बळी गेला आहे. यापाठोपाठ रशिया, भारत आणि यूके, स्पेनला कोरोनाचा फटका बसला आहे.
