मुंबई - Kali Peeli Taxi : मुंबईच्या समाजमनाशी एकरुप झालेली काळी-पिवळी टॅक्सी आता सर्वसामान्य मुंबईकरांच्या फक्त आठवणीतच उरणार आहे. अनेक दशकं मुंबईतल्या रस्त्यांवर दिमाखात धावणारी काळी पिवळी टॅक्सी आजपासून प्रवास थांबवतेय. 30 ऑक्टोबर 2023 हा मुंबईतल्या लोकप्रिय काळी पिवळी टॅक्सी प्रीमियर पद्मिनीचा शेवटचा दिवस ठरला आहे. मुंबईच्या या काळ्या-पिवळ्या टॅक्सीनं करोडो लोकांची स्वप्ने पूर्ण करण्यात मोलाची भूमिका बजावली आहे. हिंदी चित्रपटांमध्येसुद्धा काळी पिवळीनं स्वतःचं अस्तित्व दाखवलं. इतकं की, काही चित्रपटच काळी पिवळी टॅक्सीला केंद्रस्थानी ठेऊन बनवले गेले. अशाच काही चित्रपटांविषयी माहिती घेऊ या....
टॅक्सी ड्रायव्हर : हा चित्रपट 1954 रोजी रुपेरी पडद्यावर आला होता. 'टॅक्सी ड्रायव्हर' चित्रपटाचं दिग्दर्शन चेतन आनंद यांनी केलं होतं. या चित्रपटाचे संगीत दिग्दर्शक एस.डी. बर्मन दिलं होतं. 'टॅक्सी ड्रायव्हर' चित्रपटामध्ये अभिनेता देव आनंद अभिनेत्री कल्पना कार्तिक, शीला रामाणी, जॉनी वॉकर, भगवान सिन्हा या कलाकारांच्या भूमिका आहेत.
- " class="align-text-top noRightClick twitterSection" data="">
चित्रपटाची कहाणी : दोन गुंड मालाचा (कल्पना कार्तिक) विनयभंग करण्याचा प्रयत्न करतात. तेव्हा टॅक्सी चालक असलेला मंगल (देव आनंद) मालाला वाचवतो. दोघंही एकमेकांच्या प्रेमात पडतात. या चित्रपटाची कहाणी मंगल आणि मालाच्याभोवती फिरणारी आहे. या चित्रपटामधील गाणी देखील सुमधुर आहेत.
खुद्दार : 'खुद्दार' हा 1982 रोजी रुपेरी पडद्यावर रिलीज झाला होता. या चित्रपटाचं दिग्दर्शन रवी टंडन यांनी केलं. 'खुद्दार'मध्ये अमिताभ बच्चन, संजीव कुमार, परवीन बाबी, विनोद मेहरा, प्रेम चोप्रा, मेहमूद, बिंदिया गोस्वामी आणि तनुजा यांच्या भूमिका आहेत.
चित्रपटाची कहाणी : अमिताभ बच्चनची प्रमुख भूमिका असलेला हा चित्रपट टिपीकल 'लॉस्ट अँड फाउंड' फॉर्म्युल्यावर बेतलेला होता. यात अमिताभनं टॅक्सी ड्रायव्हरची व्यक्तिरेखा साकारली. धाकट्या भावाच्या, म्हणजे विनोद मेहराच्या शिक्षणासाठी अमिताभ बच्चन रात्र-दिवस टॅक्सी चालवतो. या चित्रपटातली काळी पिवळी टॅक्सी बच्चनच्या कुटुंबाचा एक अविभाज्य घटक बनते. हा चित्रपट बॉक्स ऑफिसवर फार चालला नाही.
टॅक्सी नंबर 9 2 11 : मिलन लुथरिया दिग्दर्शित आणि रमेश सिप्पी निर्मित हा चित्रपट 2006मध्ये प्रदर्शित झाला होता. यात नाना पाटेकर आणि जॉन अब्राहम यांच्या प्रमुख भूमिका होत्या. हा चित्रपट 2002 मध्ये प्रदर्शित झालेल्या 'चेंजिंग लेन्स' या अमेरिकन चित्रपटाचा रिमेक आहे.
- " class="align-text-top noRightClick twitterSection" data="">
चित्रपटाची कहाणी : राघव शास्त्री (नाना पाटेकर) दुहेरी आयुष्य जगत असतो. प्रत्यक्षात तो टॅक्सी चालक असतो. पण तो पत्नीला विमा सेल्समन म्हणून असल्याचं सांगतो. अचानक त्याला शहरातील श्रीमंत बिझनेमॅनचा मुलगा जय मित्तल भेटतो. जयला कोर्टात जायचं असतं. त्याच्या कारमध्ये मध्ये बिघाड झाल्यामुळे तो राघवच्या टॅक्सीमध्ये बसतो. त्याला कोर्टात लवकर पोहोचायचं असतं. त्यामुळे तो राघवला अधिक पैसे देऊन टॅक्सी वेगानं चालवायला सांगतो. त्यानंतर राघव सिग्नल तोडतो. राघवकडून एक अपघात घडतो. त्याच्या टॅक्सीची टक्कर एका कारशी होते. राघवला पकडला जातो. पण जय तिथून निसटतो. या चित्रपटाची कहाणी खूप मजेशीर आहे. राघव आणि जयमधल्या 'तू तू मैं मैं' मुळे चित्रपट अधिक रंजक बनतो. विशेष म्हणजे यात नाना आणि जॉनइतकंच किंबहुना त्याहूनही जास्त राघवच्या टॅक्सीला म्हणजे 'टॅक्सी नंबर नौ दो ग्यारह' ला महत्त्व आहे.
