ईशा केसकर, ओंकार भोजने, छाया कदम यांच्या प्रमुख भूमिका असलेल्या सरला एक कोटी या सत्य घटनेवरून प्रेरित असलेल्या चित्रपटाचा टिझर प्रदर्शित करण्यात आला आणि तो सोशल मीडियावर वेगानं व्हायरल होतोय. टिझरमध्ये कलाकारांची मोठी फौज दिसतेय कमलाकर सातपुते, रमेश परदेशी, सुरेश विश्वकर्मा, अभिजीत चव्हाण, विजय निकम, यशपाल सरताप हे कलाकार टिझरमध्ये वेगवेगळ्या भूमिकांमध्ये दिसत आहेत. या सगळ्यांचा भन्नाट अभिनय चित्रपटात बघायला मिळेल असं टिझरवरून दिसतंय.
- " class="align-text-top noRightClick twitterSection" data="">
पत्त्यांचा गॅम्बलर असलेला भिका (ओंकार भोजने) आणि सौंदर्याची खाण असलेली सरला (ईशा केसकर) यांचं नवीनच लग्न झालंय. आपल्या सासूसोबत (छाया कदम) आणि नवऱ्यासोबत राहणऱ्या सरलावर गावातल्या लोकांची वाईट नजर आहे. अशात काही काम न करणारा आणि पत्त्यांचा नाद असलेल्या भिका सरलाला पत्त्यात हरून डावावर लावतो अन् सुरू होतो मोठा गेम. अर्थात पुढे काय होणार हे बघण्यासाठी प्रेक्षकांना चित्रपटगृहांत जावं लागणार आहे.
टिझर मधून ओंकार आणि ईशाची जोडी मोठ्या स्क्रिनवर काय कमाल करेल याचा अंदाज येतोय. आणखी एक बाब म्हणजे टिझरमधले संवाद आणि पार्श्वसंगीत हे अत्यंत आकर्षित करणारे आहेत. त्यामुळे ‘सरला एक कोटी’ हा चित्रपट ‘पॉवर पॅक्ड’ असा चित्रपट असेल असं टिझरवरून वाटतंय.
सानवी प्रॉडक्शन हाऊस प्रस्तुत आणि आरती चव्हाण यांची निर्मित “सरला एक कोटी’’ या चित्रपटाची कथा, पटकथा आणि दिग्दर्शन अनेक पुरस्कारप्राप्त चित्रपट ‘आटपाडी नाईट्स’चे नितीन सिंधुविजय सुपेकर यांचे आहे.
सरला एक कोटी हा चित्रपट नवीन वर्षात २० जानेवारीला सर्वत्र प्रदर्शित होईल.
हेही वाचा - Fifa 2022 : शाहरुख ते मामुट्टीपर्यंत सिने सिलेब्रिटींनी साजरा केला अर्जेंटिनाचा विजयोत्सव
