Renuka Shahane Birthday : सलमान खानची वहिनी बनून मिळवली 'या' अभिनेत्रीनं प्रसिद्धी.....

Renuka Shahane Birthday : आपल्या मनमोहक स्मितहास्यासाठी प्रसिद्ध असलेली अभिनेत्री रेणुका शहाणे आज आपला 57वा वाढदिवस साजरा करतेय. रेणुकानं आपल्या करिअरची सुरुवात छोट्या पडद्यापासून केली होती. आज या खास प्रसंगी तिच्याबद्दल काही विशेष गोष्टी जाणून घेऊ या.

मुंबई - Renuka Shahane Birthday: 'हम आपके है कौन' फेम रेणुका शहाणेचा आज वाढदिवस आहे. या चित्रपटामध्ये सलमान खानची वहिनी बनून तिनं खूप प्रसिद्धी मिळवली होती. रेणुका आज आपला 57वा वाढदिवस साजरा करतेय. तिनं मराठी चित्रपटांमध्येही आपली प्रतिभा दाखवली असून छोट्या पडद्यावरही काम केलं आहे. रेणुकाचा जन्म 7 मार्च 1966 रोजी मुंबईत झाला. तिनं मिठीबाई कॉलेजमधून पदवी घेतली. त्यानंतर तिनं अभिनय क्षेत्रात पाऊल ठेवलं. रेणुकानं 1989 मध्ये दूरदर्शनवरील 'सर्कस' या मालिकेतून आपल्या अभिनय कारकिर्दीला सुरुवात केली होती. या मालिकेत तिच्याबरोबर तेव्हा नवोदित कलाकार असलेला बॉलिवूडचा 'बादशाह' शाहरुख खानदेखील होता. या शोमध्ये तिनं आपल्या गोंडस हास्यानं लोकांची मनं जिंकली.

'हम आपके है कौन' मधून प्रसिद्धी मिळाली : रेणुकानं अनेक चित्रपटांमध्ये काम केले असले तरी, तिला खरी ओळख सलमान खान आणि माधुरी दीक्षित स्टारर 'हम आपके है कौन' या चित्रपटाद्वारे मिळाली आहे. या चित्रपटात तिनं सलमानच्या वहिनीची भूमिका साकारली होती, जी अनेकजणांना भावली. या चित्रपटामध्ये तिनं एका आदर्श सूनेची व्यक्तिरेखा साकारत चाहत्यांच्या मनात एक वेगळीच जागा निर्माण केली. हा चित्रपट रेणुकासाठी खूप खास ठरला. तिनं आपल्या करिअरमध्ये अनेक हिट चित्रपट दिले आहेत. साईड रोल करून तिनं खूप नाव कमावलं. रेणुकानं 'मनी मनी', 'मासूम', 'एक अलग मौसम', 'दिल ने जिस अपना कहा', 'हायवे' यांसारख्या अनेक हिंदी चित्रपटांमध्ये काम केलं आहे. याशिवाय तिनं तमिळ आणि मराठी चित्रपटांतही काम केलं आहे.

वैयक्तिक आयुष्य : रेणुका शहाणेचा चित्रपट प्रवास हा हिट ठरला पण वैयक्तिक आयुष्यात तिला खूप संघर्ष करावा लागला आहे. तिचं पहिलं लग्न मराठी नाट्यविश्वातील कर्तबगार दिग्दर्शक विजय केंकरे यांच्याशी झालं होतं. परंतु काही दिवसांतच या नात्यात दुरावा आला आणि या दोघांचा काही काळानंतर घटस्फोट झाला. पहिलं लग्न मोडल्यानंतर तिच्या आयुष्यात एकटेपणा आला. त्यानंतर आशुतोष राणानं तिच्या आयुष्यात प्रवेश केला. या जोडप्याची प्रेमकहाणी खूप फिल्मी आहे. या दोघांची ओळख ही निर्माता हंसल मेहता यांच्या चित्रपटाच्या सेटवर झाली होती. आशुतोष रेणुकाच्या प्रेमात पडला. आशुतोषनं आधी रेणुकाबरोबर मैत्री केली. त्यानंतर तिला प्रपोज केलं. 2001 मध्ये या जोडप्यानं लग्नगाठ बांधली. रेणुका ही आशुतोषपेक्षा वयानं 2 वर्षांनी मोठी आहे.

हेही वाचा :