मुंबई - मराठी चित्रपट चालत नाहीत अशी कितीही आवई उठत असली तरी अनेक मराठी चित्रपट निर्माण होताना दिसत आहेत. तसेच मराठी सिनेमांची खासियत म्हणजे आशयघनता. त्या धाटणीचे चित्रपटही निर्माण होत आहेत. सामाजिक विषय मनोरंजकपणे हाताळला तर प्रेक्षकांचा पाठिंबा मिळतो. असाच एक चित्रपट ‘मसुटा’, जो सामाजिक मनोरंजक सिनेमाच्या व्याख्येत अचूक बसणारा चित्रपट आहे, तो आता प्रदर्शनासाठी तयार आहे. वेगळ्या वाटेनं जाणारा 'मसुटा' असं शीर्षक असलेला मराठी चित्रपट मराठी रसिकांसमोर एक आगळी वेगळी कथा सादर करणार आहे. या चित्रपटानं आजवर देश-विदेशांतील बऱ्याच सिनेमहोत्सवांमध्ये आपला ठसा उमटवला आहे. 'मसुटा' हा चित्रपट म्हणजे जगण्यासाठी धडपड करणारी जगावेगळी कर्मकहाणी आहे. यात समाजातील एका विशिष्ट वर्गातील मनाला भिडणारी कथा पहायला मिळेल. या चित्रपटाच्या माध्यमातून विविध सामाजिक संदेशही देण्यात आले आहेत. दिग्दर्शक अजित देवळे यांनी हे सर्व आपल्या अनोख्या दिग्दर्शनशैलीद्वारे मनोरंजक करण्याचं काम केलं आहे.
याबाबत दिग्दर्शक देवळे म्हणाले की, ‘मसुटा' हा जरी एका विशिष्ट वर्गातील कुटुंबाची कथा सांगणारा असला तरी परिपूर्ण मनोरंजक चित्रपट आहे. दर्जेदार निर्मितीमूल्ये, प्रासंगिक गीतरचना आणि सुमधूर संगीताची किनार याला जोडण्यात आली आहे. मराठीसह हिंदीतही वावरणाऱ्या आघाडीच्या कलाकारांसह इतर कलावंतांनी हृदयस्पर्शी अभिनय केला आहे. अखेरपर्यंत खिळवून ठेवणारी पटकथा हे या चित्रपटाचं सर्वात मोठं बलस्थान आहे. वास्तववादी लोकेशन्सवर चित्रीत करण्यात आलेला हा चित्रपट प्रेक्षकांना वास्तवदर्शी अनुभव देईल याची निश्चितच खात्री आहे.
पटकथा लेखन करणार्‍या भरत मोरे यांनी माहिती देताना सांगितले, 'मी वास्तविक लेखन करत असताना अनेक स्मशानात गेलो, म्हसणजोगी कुटूंबाची कर्मकहाणी त्यांच्याच मुखातून समजावून घेतली. या आधुनिक जगापुढे आपल्या पारंपरिक व्यवसायामुळे आजही या म्हसणजोगी समाजाला किती यातना सहन कराव्या लागतात या इतर शिक्षित समाजाला सांगण्याचा काहीसा धाडसी प्रयत्न लिखाणातून केला आहे. समस्त जगभरातील मानवजातीला देहदानाचा संदेश या चित्रपटाच्या अति मनोरंजक कथानकातून करून देणार असल्याने मायबाप रसिक प्रेक्षकांना मनोरंजनाची अनोखी मेजवानी नक्कीच मिळणार आहे.'
मसुटाचं पटकथा लेखन भरत मोरे यांनी केलं असून, अनिल राऊत यांनी संवाद लिहिले आहेत. अनंत जोग, नागेश भोसले, हृदयनाथ राणे, रियाझ मुलाणी, अर्चना महादेव, वैशाली केंडाळे, कांचन पगारे, यश मोरे आदी कलाकारांनी या चित्रपटात अभिनय केला आहे. गीतरचना आणि संगीत अविनाश पाटील व सुनील म्हात्रे यांचं आहे. आदर्श शिंदे, अबोली गिऱ्हे, अविनाश पाटील यांनी या चित्रपटासाठी गायन केलं असून कॅास्च्युम डिझाईन चैत्राली डोंगरे यांनी केलं आहे. डिओपी दिलशाद व्ही. ए. यांनी सिनेमॅटोग्राफी केली असून, पार्श्वसंगीत पिनाकी रॅाय यांनी केलं आहे. बॉक्स हिट मूव्हीज या चित्रपटाच्या वितरणाची जबाबदारी सांभाळणार आहे.
काशिबाई फिल्म्स प्रोडक्शन आणि साईसागर प्रॉडक्शनची निर्मिती असलेल्या मसुटा या चित्रपटाची निर्मिती भरत मोरे आणि मनेश लोढा यांनी केली आहे. अजित देवळे आणि सुनील शिंदे या चित्रपटाचे असोसिएट प्रोड्युसर्स आहेत. अजित देवळे यांनीच 'मसुटा'चं दिग्दर्शन आणि संकलनही केलं आहे. सामाजिक मनोरंजक सिनेमाच्या व्याख्येत अचूक बसणारा 'मसुटा' येत्या २४ फेब्रुवारीला प्रदर्शित होणार आहे.
हेही वाचा - Song Naiyo Lagda Teaser: सलमान खान आणि पूजा हेगडे नैयो लगदा गाण्यातून बनवणार व्हेलेंटाईन मूड
