मुंबई : नुकतीच महाराष्ट्र शासनाने चित्रपट-नाट्यगृहांत १००% उपस्थितीची परवानगी दिली. त्यामुळे नाट्यकर्मी खुश असून जोमाने कामाला लागले आहेत. कोरोना महामारीच्या कालखंडात अडकलेली अनेक नाटकं आता प्रयोगांसाठी सज्ज होत आहेत. मराठी नाटक-विश्वात डॉ गिरीश ओक अनेक वर्षे कार्यरत आहेत. यावर्षी ते नाट्यसृष्टीत ३८ वर्षे पूर्ण करीत असून त्यांचे नवीन नाटक येऊ घातले आहे ज्याचे नाव आहे, ‘38 कृष्ण व्हिला’. तसेच रंगभूमीवरील त्यांचे हे ५० वे नाटयपुष्प असेल.
38 कृष्ण व्हिला
‘ओळखीचा चेहरा की चेहऱ्याची ओळख’? नाटकाची ही टॅगलाइन त्यातील गर्भितार्थ दाखवून देणारी आहे. प्रत्येकजण येथे आपापले मुखवटे सांभाळून असतो. प्रसंगी त्यांना जपत असतो. मुखवट्याआडचा खरा-खोटा, असेल तसा चेहरा दिसू नये म्हणून काळजी घेत असतो. ‘अंदाज आरशाचा वाटे खरा असावा बहुतेक माणसाचा तो चेहरा असावा....’ गझलकार इलाही जमादार यांच्या या ओळीतुन चेहऱ्यामागचं खरं गुपित उलगडून दाखवलयं ‘38 कृष्ण व्हिला’ या नाटकातूनही चेहऱ्यामागचा माणूस शोधण्याचा प्रयत्न असणार आहे. ‘38 कृष्ण व्हिला’ नाटकामध्ये डॉ. गिरीश ओक देवदत्त कामत या भूमिकेत आपल्यासमोर येणार आहेत. देवदत्त कामत ह्या प्रथितयश व्यक्तीवर नंदिनी चित्रे, ही अनोळखी स्त्री एक गंभीर आरोप करते आणि त्यांच्यापुढे उभे राहते एक नवे आव्हान, स्वतःला निर्दोष सिद्ध करण्याचे. 38, कृष्ण व्हिला ह्या घरात भरला जातो एक आगळा वेगळा खटला, सुरू होते आरोप प्रत्यारोपांची मालिका, वाद प्रतिवादांच्या फैरी झडतात आणि समोर येते एक धक्कादायक वास्तव. रहस्यमय पार्श्वभूमीवर बेतलेले हे नाटक अनेक रंजक वळणांनी प्रेक्षकांच मनोरंजन करणार असणार आहे.
हेही वाचा - MI Vasantrao : नाना पाटेकर यांच्या उपस्थितीत ‘मी वसंतराव' चे ट्रेलर प्रदर्शित!
