मुंबई - आचारसंहितेचा भंग करणाऱ्या झी टीव्ही आणि अॅन्ड टीव्ही या वाहिन्यांचे प्रक्षेपण थांबवा, अशी मागणी काँग्रेसचे प्रवक्ते सचिन सावंत यांनी निवडणूक आयोगाकडे केली आहे. 'भाभीजी घर पर है' आणि 'तुझसे है राबता' या दोन मालिकेत भाजपचा प्रचार केल्याचा आरोप विरोधकांनी केला आहे.
सावंत म्हणाले, की निवडणूक आचारसंहिता जाहीर झाल्यानंतर भारतीय जनता पक्षातर्फे वारंवार आचारसंहितेचा भंग झाला आहे. आता तर लोकप्रिय मालिकांचा वापर सरकारच्या योजनांचा प्रचार करण्यासाठी केला जाऊ लागला आहे. भाभीजी घर पर है आणि तुझसे है राबता या मोठ्या प्रमाणात पाहिल्या जाणाऱ्या मालिका आहेत. त्यामुळेच भाजपकडून या मालिकेत ही दृश्ये अंतर्भूत करण्यात आली. ही दृश्ये पेन ड्राईव्हमधून निवडणूक आयोगाकडे सादर केली आहेत असे सावंतर यांनी सांगितले.
सदर मालिकांमध्ये पंतप्रधान नरेंद्र मोदी तसेच सरकारतर्फे हाती घेण्यात आलेल्या अनेक योजनांची भलामण जाहिरातीप्रमाणे करण्यात आली आहे. याकरिता कुठेही जाहिरात म्हणून सूचना देण्यात आलेली नाही. लोकांची मानसिकता प्रभावित करून सत्ताधाऱयांना लाभ मिळवून देण्याचा कुटील डाव यातून स्पष्टपणे समोर आला आहे.
पेड न्यूज ही देखील याच प्रकारात मोडते. त्यामुळे पेड न्यूजच्या धर्तीवर या प्रकाराची नोंद घेऊन जनतेचा विश्वासघात तथा आचारसंहितेचे घोर उल्लंघन केल्याबद्दल या वाहिन्यांचे प्रक्षेपण तात्काळ बंद करावे. वाहिन्यांचे मालक, तसेच मालिकांचे निर्माते आणि कलाकारांसोबतच भारतीय जनता पक्षावर आचारसंहिता भंगाचा गुन्हा दाखल झाला पाहिजे. या प्रकरणात कोट्यवधींचा आर्थिक व्यवहार झाला असण्याची शक्यता आहे. त्याचीही चौकशी करून भ्रष्टाचाराचा गुन्हा दाखल करावा ही अशी मागणी सावंत यांनी केली आहे.
