पेण (रायगड) - पोलीस असल्याचा गैरफायदा घेत पती व मुलांना जीवे ठार मारण्याची धमकी दिली. विवाहित महिलेशी मागील सहा वर्षांपासून शारीरिक संबंध ठेवणाऱ्या पोलीस कॉन्स्टेबल शाम जाधव याच्याविरोधात पेण पोलीस ठाण्यात गुन्हा दाखल ( pen policeman rape married woman ) करण्यात आला आहे. पेण पोलिसांनी आरोपी शाम जाधव याला अटक केली व त्यास न्यायालयात हजर केले असता, त्याला 4 जानेवारी आजपर्यंत पोलीस कोठडी सुनावण्यात आली आहे.
आरोपीला चार जानेवारीपर्यंत पोलीस कोठडी -
अलिबाग येथील मुख्यालयात कार्यरत असलेला पोलीस कॉन्स्टेबल शाम जाधव (रा. शिवाजी नगर, रामवाडी, पेण) याने पोलीस असल्याचा फायदा घेत पेण शहरातील एका विवाहित महिलेला तिच्या पतीला व मुलांना जीवे मारण्याची धमकी देऊन 2015 पासून आजपर्यंत जबरदस्तीने शारीरिक संबंध ठेवले असल्याची तक्रार या महिलेने पेण पोलीस ठाण्यात शुक्रवारी रात्री दाखल केली आहे. त्यानुसार पेण पोलीस ठाण्यात आरोपी पोलीस शाम जाधव याच्या विरोधात भा.द.वि. कलम 376 (1), 323, 504, 506 प्रमाणे गुन्हा दाखल केला आहे. आरोपी शाम जाधव याला पेण पोलिसांनी अटक केली असून त्यास न्यायालयात हजर केले असता त्यास चार जानेवारी पर्यंत पोलीस कोठडी सुनावण्यात आली आहे.
पोलिसाने केली पोलीस ठाण्यात पोलिसांनाच मारहाण -
आरोपी शाम जाधव याच्या विरोधात सदर महिला पोलीस ठाण्यात फिर्याद देण्यासाठी गेली असता या महिलेची फिर्याद ऐकुण घेत असताना आरोपी शाम जाधव याने पेण पोलीस ठाण्यात जाऊन गोंधळ घातला. ड्युटीवर असलेल्या महिला पोलीस नाईक व महिला पोलीस उप निरीक्षक घाडगे यांना शिवीगाळ केली. यावेळी ड्युटीवर असलेले पोलीस नाईक गुजराथी व पोलीस शिपाई मढवी हे समजावण्यासाठी गेले असता त्यांना देखील शिवीगाळ करुन हाताबुक्क्याने मारहाण केली. तसेच शाम जाधव याला तपासणीसाठी उपजिल्हा रुग्णालयात नेण्यासाठी आलेले पोलीस शिपाई जाधव याना शिवीगाळ करुन लाथेने मारहाण केली व गुजराथी यांच्या कानाखाली मारली. या याप्रकरणी देखील आरोपी शाम जाधव याच्या विरोधात पेण पोलीस ठाण्यात सरकारी कामात अडथळा आणल्या प्रकरणी भा.द.वि. कलम 353 प्रमाणे गुन्हा दाखल करण्यात आला आहे. याबाबत पोलीस निरिक्षक देवेंद्र पोळ यांच्या मार्गदर्शनाखाली पेण पोलीस अधिक तपास करीत आहेत.
हेही वाचा - Pune Accident : चौथ्या मजल्यावरून लोखंडी रॉड कोसळून 16 वर्षीय मुलगा गंभीर जखमी; घटना सीसीटीव्हीत कैद
