नवी दिल्ली/गाझियाबाद: गाझियाबादच्या साहिबााबाद पोलिस स्टेशन परिसरात गेल्या वर्षी डिसेंबरमध्ये पाच वर्षांच्या निष्पाप मुलीचे अपहरण करून तिची हत्या करणाऱ्या आरोपीला गाझियाबाद पॉक्सो कोर्टाने शुक्रवारी दोषी ठरवले. आरोपीला शिक्षेची तारीख 4 फेब्रुवारी निश्चित करण्यात आली होती. विशेष सरकारी वकील संजीव बखरवा यांनी सांगितले की, न्यायालयाने आरोपी असलेल्या सोनूला फाशीची शिक्षा सुनावली आहे. या खटल्यात एकूण 15 साक्षीदार न्यायालयात हजर झाले, ज्यात दररोज सुनावणी झाली. अशाप्रकारे न्यायालयाने या खटल्यात 64 दिवसांत शिक्षा सुनावली आहे.
मुलीच्या प्रायव्हेट पार्टवर होत्या गंभीर जखमा : हे प्रकरण गाझियाबादच्या साहिबाबाद पोलीस स्टेशन क्षेत्राशी संबंधित आहे. 1 डिसेंबर रोजी येथून 5 वर्षांची मुलगी बेपत्ता झाली, त्यानंतर तिच्या कुटुंबीयांनी तिचा खूप शोध घेतला, मात्र ती सापडली नाही. 2 डिसेंबर रोजी जवळच्या जंगलात शोध घेत असताना मुलीचा मृतदेह सापडला होता. तिचा मृतदेह पोस्टमॉर्टमसाठी पाठवला असता धक्कादायक बाबी समोर आल्या. पोस्टमॉर्टम रिपोर्टनुसार मुलीच्या प्रायव्हेट पार्टवर गंभीर जखमा होत्या. तिच्यासोबत बलात्काराची ही घृणास्पद घटना घडल्याचे उघड झाले होते.
आरोपी अनेक दिवसांपासून करत होता पाठलाग : चौकशीत आरोपीने अनेक धक्कादायक खुलासे केले आहेत. त्याने सांगितले की, तो रोज एका शाळकरी मुलीला फॉलो करत असे. 1 डिसेंबरलाही तो एका विद्यार्थिनीच्या मागे सिटी फॉरेस्टजवळील कॉलनीच्या दिशेने जात असताना तो तिला टार्गेट करू शकला नाही. यानंतर त्याने कॉलनीत खेळणाऱ्या पाच वर्षीय मुलीचे अपहरण करून तिच्यासोबत बलात्काराची ही घृणास्पद घटना केली.
अन् आरोपी कोर्टातच रडू लागला : 15 पथकांच्या अथक परिश्रमाने, 200 हून अधिक सीसीटीव्ही फुटेजच्या आधारे आरोपीची ओळख पटली आणि त्याच्या रेखाचित्राच्या आधारे त्याला अटक करण्यात आली. सुरुवातीला या घटनेत बालकांचे अपहरण करणाऱ्या टोळीचा हात नाही, असे मुलीच्या कुटुंबीयांना वाटले, मात्र बलात्काराचे प्रकरण समोर आल्यावर त्यांच्या पायाखालची जमीनच सरकली. कोर्टाने शिक्षा सुनावताच डब्यात उभा असलेला सोनू तोंडावर हात ठेवून रडू लागला.
राजस्थानात बलात्कार प्रकरणी २० वर्षे सक्तमजुरीची शिक्षा : दुसरीकडे राजस्थानातील जयपूरच्या विशेष न्यायालयाने १५ वर्षांच्या मुलीचे अपहरण करून तिच्यावर बलात्कार केल्याप्रकरणी एका नराधमाला २० वर्षे सक्तमजुरीची शिक्षा सुनावली आहे. विशेष न्यायाधीश, POCSO न्यायालय, तारा अग्रवाल यांनी देखील शिवम यादव (22) याला ऑक्टोबर 2020 च्या खटल्यात दोषी ठरवल्यानंतर 50,000 रुपयांचा दंड ठोठावला, असे विशेष सरकारी वकील राकेश महर्षी यांनी सांगितले. यादवने तरुणीला चॉकलेटचे आमिष दाखवून अपहरण करून नेत आठ महिने जबरदस्तीने शारीरिक संबंध ठेवले, असे मेहर्षी यांनी सांगितले.
