ठाणे - गुजरातला मेगा वेदांत फॉक्सकॉन सेमीकंडक्टर प्रकल्प गेल्यामुळे विरोधकांनी टीकेचा भडिमार सुरू केला आहे (Vedanta Foxconn like project). त्यावर महाराष्ट्र सरकारने बुधवारी सांगितले की, पंतप्रधान नरेंद्र मोदी यांनी राज्याला असाच किंवा आणखी चांगला प्रकल्प मिळेल, असे आश्वासन दिले आहे. ठाण्यात पत्रकारांशी बोलताना राज्याचे उद्योगमंत्री उदय सामंत म्हणाले की, गुजरातने हा प्रकल्प मिळवल्यानंतर मुख्यमंत्री एकनाथ शिंदे यांनी मंगळवारी पंतप्रधानांशी चर्चा केली. हा प्रकल्प महाराष्ट्रात आणण्याचा प्रस्ताव होता. परंतु वेदांत-फॉक्सकॉनने गुजरातला अंतिम रूप दिले आणि मंगळवारी त्या सरकारशी संयुक्तपणे सामंजस्य करार केला. यामुळे राजकीय दोषारोपाचा खेळ सुरू झाला.
मुख्यमंत्र्यांनी वेदन्ता (फॉक्सकॉन) वर आपले मत पंतप्रधानांसमोर मांडले. याबाबत मुख्यमंत्र्यांनी पंतप्रधानांशी सविस्तर चर्चा केली. पंतप्रधानांनी आश्वासन दिले आहे की, महाराष्ट्राला असाच किंवा यापेक्षा चांगला प्रकल्प दिला जाईल, असे सामंत म्हणाले. गेल्या आठ महिन्यांपासून महाराष्ट्रासाठी प्रकल्पाला अंतिम स्वरूप देण्यासाठी चर्चा सुरू होती. त्याबाबत बैठकाही झाल्या असा दावा मंत्र्यांनी केला.
सामंत म्हणाले की, केंद्र आणि शिंदे सरकार बेरोजगारी समस्या सोडवण्यासाठी कटिबद्ध आहे. शिवसेनेचे नेते आणि माजी मंत्री आदित्य ठाकरे म्हणाले होते की, पूर्वीच्या महाविकास आघाडी (MVA) सरकारने हा प्रकल्प जवळजवळ अंतिम केला होता. सध्याच्या व्यवहारामुळे संभाव्य गुंतवणूकदारांचा विश्वास उडाला आहे, असा आरोप त्यांनी केला. भारतीय समूह वेदांत आणि तैवानी इलेक्ट्रॉनिक्स उत्पादन क्षेत्रातील दिग्गज फॉक्सकॉन यांच्या संयुक्त उपक्रमाने राज्यात सेमीकंडक्टर आणि डिस्प्ले मॅन्युफॅक्चरिंग युनिट स्थापन करण्यासाठी मंगळवारी गुजरात सरकारसोबत सामंजस्य करारावर स्वाक्षरी केली. वेदांत-फॉक्सकॉन 1,54,000 कोटी रुपयांची गुंतवणूक करणार आहे. यामुळे एक लाख रोजगाराच्या संधी निर्माण होतील.
