ठाणे - कल्याण रेल्वे स्थानकाशेजारील पार्किंग नजीक लघुशंका करणाऱ्या तरुणाला तृतीयपथींनी धक्का मारून लुटल्याची घटना उघडकीस आली आहे. शकीला ठाकरे, असे या लुटमार करणाऱ्या तृतीयपंथीयाचे नाव आहे. पोलिसांनी त्याला अटक केली आहे. तर त्याच्या २ साथीदारांचा कोळसेवाडी पोलीस शोध घेत आहेत.
कल्याण पूर्वेकडील चिंचपाडा परिसरातील एकविरा प्लाझामध्ये राहणारे प्रविण चंदानी हे सोमवारी रात्री १० वाजण्याच्या सुमारास कल्याण रेल्वे प्लॅटफॉर्म क्रमांक ७ च्या शेजारी असलेल्या दुचाकी पार्किंग जवळील रेल्वेच्या कार्यालयामागे लघुशंका करत होते. यावेळी अचानक त्यांच्या पाठीमागून शकीला नावाचा तृतीयपंथी आपल्या २ साथीदारांसह आला. या तिघांनी चंदानी यांना जोरात धक्का मारला. त्यानंतर त्याच्या जवळील २९ हजार ९०० रुपयांची रोकड हिसकावली.
तृतीयपंथीयांनी अचानक घातलेल्या गोंधळामुळे चंदानी यांनी आरडाओरड केली. यामुळे आसपासच्या नागरिकांनी त्या ठिकाणी धाव घेऊन शकीला या तृतीयपंथीयाला पकडून बेदम चोप दिला आणि आरपीएफच्या ताब्यात दिले. आरपीएफ पोलिसांनी ताब्यात घेतलेल्या या लुटारू तृतीयपंथीयाला पोलिसांच्या स्वाधीन केले. या प्रकरणी पोलिसांनी शकीला या तृतीयपंथीयासह त्याच्या २ साथीदारांविरोधात गुन्हा नोंदवला असून त्या २ साथीदारांचा शोध सुरू केला आहे.
