रत्नागिरी - राज्यातील आघाडी सरकार हे खंबीर असून, केंद्रात राज्याची बाजू मांडणारे आमचे आघाडीचे खासदार देखील तत्पर आहेत. केंद्राने राज्यच्या विकासात भर टाकावी, अशी मागणी आमचे खासदार करत आहेत. तरीही केंद्र शासन महराष्ट्राकडे दुर्लक्ष करत आहे. दिल्लीसमोर झुकणार नाही, पण दिल्लीकडून चांगली कामे करून घेण्याची आपली ताकद आहे, असे राज्याचे पर्यटन, पर्यावरण व राजशिष्टाचार मंत्री आदित्य ठाकरे यांनी आज दापोलीत सांगितले. दापोली येथील छत्रपती शिवाजी महाराजांच्या अश्वारुढ पुतळ्याचे ( Aditya Thackeray inaugurate shivaji maharaj statue dapoli ) अनावरण मंत्री आदित्य ठाकरे यांच्या हस्ते झाले. या सोहळ्याप्रसंगी ते बोलत होते.
हेही वाचा - आंबिवली रेल्वे स्थानकात फेरीवाल्याकडून पोलिसाला बेदम मारहाण
दापोलीत होणाऱ्या छत्रपती शिवाजी महाराजांच्या अश्वारुढ पुतळ्याच्या अनावरणचा समारंभ जणू एखाद्या सणासारखा साजरा होत असताना पाहून आनंद व्यक्त करून पर्यटनमंत्री आदित्य ठाकरे म्हणाले की, महाविकास आघाडी सरकार स्थापन झाल्यानंतर पहिल्याच मंत्रिमंडळाच्या बैठकीत रायगड किल्ल्यासाठी 600 कोटी रुपये मंजूर करण्यात आले. त्यानंतर कोकणातील सर्वच किल्ल्यांचे संवर्धन करण्याची भूमिका महाविकास आघाडी सरकारने घेतली आहे. त्यासाठी समिती नेमण्यात आली असून, समितीच्या माध्यमातून किल्ले संवर्धनाचे काम केले जात आहे. किल्ले संवर्धनासाठी वेळप्रसंगी दिल्लीकडे पाठपुरावा करावा लागेल तो सुद्धा करू, परंतु कोणत्याही परिस्थितीत किल्ले संवर्धनाचे काम थांबणार नाही.
कोकणातील पर्यटन वाढीच्या दृष्टीने प्रयत्न सुरू आहेत. कोकणात रोजगार निर्मिती कशी होईल या दृष्टीने पाठपुरावा केला जात आहे. छत्रपतींच्या पुतळ्याचे बांधकाम स्थानिक माती व स्थानिक जांभा या दगडाने केले असल्याने त्याचे स्वरूप आणि महत्त्व वाढले आहे. पुतळ्याचे बांधकाम राजांना शोभेल असे करण्यात आले आहे. असे सांगून आदित्या ठाकरे यांनी स्थानिक लोकप्रतिनिधींचे कौतुकही केले.
आमदार योगेश कदम भाषण करताना झाले भावूक : दरम्यान आमदार योगेश कदम यावेळी भाषण करताना भावूक झाल्याचे पहायला मिळाले. मी एक स्वप्न पाहिले होते आज हे स्वप्न पूर्णत्वास जात आहे. त्याहीपेक्षा माझ्यासाठी महत्त्वाचे म्हणजे, ज्यांची प्रेरणा घेऊन मी या राजकारणात उतरलो, ते आमचे युवासेनाप्रमुख आदित्य ठाकरे यांच्या हस्ते झाले. याचा आनंद मोठा आहे, असे सांगताना आमदार योगेश कदम भावूक झाल्याचे पाहायला मिळाले.
यावेळी राज्याचे परीवहन संसदीय कार्यमंत्री तथा रत्नागिरी जिल्ह्याचे पालकमंत्री ॲड. अनिल परब, राज्याचे उच्च व तंत्र शिक्षण मंत्री, तथा सिंधुदुर्ग जिल्ह्याचे पालकमंत्री उदय सामंत, पर्यटन, माहिती व जनसंपर्क राज्यमंत्री तथा रायगडच्या पालकमंत्री आदिती तटकरे, खासदार सुनिल तटकरे, खासदार विनायक राऊत, आमदार भास्कर जाधव, आमदार योगेश कदम, आमदार राजन साळवी, माजी आमदार सूर्यकांत दळवी, आदी मान्यवर उपस्थित होते.
हेही वाचा - Mount Everest : ठाण्यातील दोघा विद्यार्थिनींनी रोवला गिर्यारोहणाचा झेंडा; एव्हरेस्ट सर करण्याचा आहे ध्यास
