सोलापूर - पंढरपुरात आषाढी एकादशीचा सोहळा सोमवारी मोठ्या उत्साहात साजरा झाला. मात्र, चंद्रभागा नदीत बुडून दोन युवकांचा मृत्यू झाल्याने याला गालबोट लागले. नागपूरहून ( Nagpur ) पंढरपूरला ( Pandharpur ) तीन तरुण आषाढी वारीला विठ्ठलाच्या दर्शनासठी आले होते. यातील दोन तरुणाचा चंद्रभागा नदीच्या पाण्यात बुडून मृत्यू झाला. सचिन शिवाजी कुंभारे (२८, रा. जलालखेडा जि नागपूर) व विजय सिद्धार्थ सरदार (२७, रा. नारसिंगी जि नागपूर) असे मृत्यू झालेल्या युवकांची नावे आहेत. दोघांचे मृतदेह पंढरपूर येथील शासकीय रुग्णालयात ( Pandharpur Government Hospital ) शवविच्छेदन साठी दाखल करण्यात आले आहे.
एकमेकांना वाचविताना दोघांनी गमावले प्राण - नागपूर जिल्ह्यातील नरखेड तालुक्यातील जलालखेडा व नारसिंगी येथील तीन युवक आषाढी एकादशीनिमित्त विठ्ठलाच्या दर्शनाला पंढरपूरला आले होते. रविवारी सकाळी ते रेल्वेने पंढरपूर येथे पोहोचले. विठूरायाच्या दर्शना अगोदर अंघोळ करावी असे मित्रांनी ठरवले. सचिन कुंभारे व विजय सरदार हे दोघे अंघोळीसाठी चंद्रभागा नदी पात्रात उतरले. परंतु, पाणी जास्त असल्यामुळे सचिन बुडू लागला. त्याला वाचवण्यासाठी गेलेला विजयसुद्धा पाण्यात बुडाला.
नागरिकांचे प्रयत्न व्यर्थ - सचिन व विजय हे दोघे मित्र वाहत असल्याचे नदी पात्राबाहेर उभ्या असलेल्या मित्राला दिसले. त्याने आरडाओरड केल्याने आजूबाजूला असलेल्या नागरिकांनी बचावाचा प्रयत्न केला. काही नागरिकांनी नदीत उडी घेत दोघांना वाचण्याचा प्रयत्न केला. सचिन व विजय यांना पाण्यातून बाहेर काढून रुग्णालयात नेले. परंतु, डॉक्टरांनी दोघांनाही मृत घोषित केले.
दोन वर्षानंतर वारी - मागील दोन वर्ष कोरोनाच्या आजारामुळे पंढरपूरची पायी वारी होऊ शकली नव्हती. एकमेकांच्या संपर्कात आल्याने कोरोना अत्यंत वेगाने पसरत असल्याने 2020 ला सर्वप्रथम देशभरात लॉकडाऊन लावण्यात आला होता. त्यामुळे संपूर्ण महाराष्ट्रातही बंद होता. यावर्षीच्या पायी वारी कोरोनाच्या प्रभावामुळे रद्द करण्याचा निर्णय राज्य सरकारने घेतला होता. त्यानंतर 2021 मध्ये कोरोनाची दुसरी लाट आली आणि महाराष्ट्रात लॉकडाऊन लागला होता. त्यामुळे दुसऱ्या वर्षीही वारी होऊ शकली नव्हती. दोन वर्षानंतर प्रथमच अत्यंत उत्साहात वारीतून लाखो भाविक पंढरपुरात यावर्षी दाखल झाले.
15 लाख भाविक पंढरपुरात - दोन वर्षांनंतर प्रथमच झालेल्या वारीमध्ये लाखो भाविक पंढरपुरात आले होते. आषाढीच्या दिवशी सुमारे 15 लाख भाविक पंढरपुरात विठूरायाच्या दर्शनासाठी आले होते. मुख्यमंत्री एकनाथ शिंदे यांच्या हस्ते विठ्ठल-रुक्मिणीची यंदा शासकीय महापूजा करण्यात आली. अत्यंत उत्साहात आषाढी वारी साजरी झाली. वाककऱ्यांचा प्रचंड मोठा मेळा पंढरपुरात भरला होता. लाखो भाविकांनी चंद्रभागेमध्ये पवित्र स्नान करीत विठ्ठल-रुक्मिणीचे दर्शन घेतले. हे सर्व होत असतानाच नागपूरचे दोन युवक चंद्रभागेच्या पाण्यात बुडून पडल्याची घटना घडली.
हेही वाचा - Sharad Pawar : औरंगाबादच्या नामांतरावरुन शरद पवारांनी झटकले हात; म्हणाले, 'याची कल्पना...'
