पुणे - नव्याने चाकण पोलीस ठाण्यापासून विभक्त करण्यात आलेल्या महाळुंगे पोलीस चौकीला काहीच महिने झाले आहेत. मात्र, गुन्हे शाखा युनिट तीनचे वरिष्ठ पोलीस निरीक्षक अनिल उर्फ भानुदास जाधव यांच्यासह पोलीस नाईक अजय भापकर आणि त्यांचा खाजगी सहायक (झिरो पोलीस) यांना शनिवारी सायंकाळी पाचच्या सुमारास तीन लाखांची लाच घेताना लाचलुचपत प्रतिबंधक विभागाने पकडले आहे.
हेही वाचा - ...अन् अजित पवारांना रडू कोसळले, म्हणाले आम्हालाही भावना असतात
घटनेतील तक्रारदाराने यासंदर्भात लाचलुचपत प्रतिबंधक विभागाकडे तक्रार केली होती. पोलीस निरीक्षक जाधव यांनी ही रक्कम ताब्यात घेण्यासाठी पोलीस नाईक अजय भापकर आणि एका खाजगी सहाय्यकास सांगितले होते. दरम्यान, पोलीस निरीक्षक जाधव यांच्या आदेशानंतर तक्रारदार आणि पोलीस नाईक भापकर खराबवाडी येथे गेले. त्यांच्या मागावर लाच लुचपत प्रतिबंधक विभागाचे पथक होतेच. यानंतर भापकर यांनी लाचेची रक्कम खासगी सहाय्यक असलेल्या पाटील नामक व्यक्तीच्या चारचाकी वाहनात देण्यास सांगितले. दरम्यान, रक्कम या वाहनात देताच लाच लुचपत प्रतिबंधक विभागाने त्या वाहनाकडे धाव घेतली. मात्र, पाटील नामक इसमाने वेगात पळून जाण्याचा प्रयत्न केला. पोलीस निरीक्षक अनिल उर्फ भानुदास जाधव यास ताब्यात घेण्यात आले असून, वाहन आणि त्यातील लाचेची ३ लाखांची रक्कम हस्तगत करण्यात आली आहे. रात्री उशिरापर्यंत गुन्हा दाखल करण्याची कार्यवाही सुरू होती.
हेही वाचा - प्रकाश आंबेडकर बाबासाहेबांपेक्षा मोठे आहेत का?
महाळुंगे परिसरात मागील काही दिवसात नवीन चौकी झाल्यानंतर वरिष्ठ पोलीस निरीक्षक अनिल उर्फ भानुदास जाधव यांच्याकडे या चौकीचा पदभार देण्यात आला होता. दरम्यान, या भागातील नागरिकांना आणि उद्योजकांना पैशांसाठी त्रस्त केले जात होते. तसेच अवैध धंदेही बोकाळले होते. या अवैध धंद्यांमध्ये काही पोलिसांचीच भागीदारी असल्याची चर्चा होती. गुन्हे शाखेच्या माध्यमातूनही काहींना त्रास दिला जात असल्याच्या तक्रारी होत्या. दरम्यान, पिंपरी-चिंचवड आयुक्तालयाच्या वरिष्ठ अधिकाऱ्यांनी चाकण पोलीस ठाण्यात रात्री उशिरा हजेरी लावल्याची माहिती आहे.
अनिल उर्फ भानुदास जाधव यांच्यावरील पुर्वीची कारवाई -
27 जून 2011 ला खालापूरमधील रेव्ह पार्टीसंदर्भात पोलीस निरीक्षक अनिल उर्फ भानुदास जाधव यांना निलंबित करण्यात आले होते. पार्टी आयोजकांना मदत केल्याचा आणि नशेरी पदार्थ पुरवल्याचा जाधवांवर आरोप होता. त्यावेळी ऍन्टी नार्कोटीक्सचे पोलीस निरीक्षक अनिल उर्फ भानुदास जाधव यांना अटक करण्यात आली होती.
हेही वाचा - पाकिस्तानच्या खेळाडूंशी 'पंगा' घेणे माझी आवड, भारतीय फलंदाजाचा खुलासा
