म्हाडा परीक्षेत झालेल्या गैरप्रकाराचा तपास करून गुन्हा दाखल करावा, एमपीएससी समन्वय समितीची मागणी

जानेवारी-फेब्रुवारी, २०२२ महिन्यात म्हाडाच्या विविध पदांची परीक्षा संपूर्ण महाराष्ट्रात पार पडली. या परीक्षा टीसीएस या खासगी कंपनीने घेतल्या आहेत. या कंपनीने स्वतःच्या आयओएन केंद्रा व्यतिरिक्त इतर खासगी कॉम्प्युटर सेंटर व महाविद्यालयात सेंटर दिले होते. मात्र, त्या ठिकाणी उमेदवारांच्या तपासणीची कोणतीही व्यवस्था नव्हती. यामुळे काही ठिकाणी परिक्षेत गैरप्रकार घडला आहे, असा आरोप एमपीएससी समन्वयक याने केला आहे.

पुणे - जानेवारी-फेब्रुवारी, २०२२ महिन्यात म्हाडाच्या विविध पदांची परीक्षा संपूर्ण महाराष्ट्रात पार पडली. या परीक्षा टीसीएस या खासगी कंपनीने घेतल्या आहेत. या कंपनीने स्वतःच्या आयओएन केंद्रा व्यतिरिक्त इतर खासगी कॉम्प्युटर सेंटर व महाविद्यालयात सेंटर दिले होते. मात्र, त्या ठिकाणी उमेदवारांच्या तपासणीची कोणतीही व्यवस्था नव्हती. यामुळे काही ठिकाणी परिक्षेत गैरप्रकार घडला आहे, असा आरोप एमपीएससी समन्वयक राहुल कवठेकर याने केला आहे.

याबाबतच त्यांनी पुणे सायबर पोलीस, म्हाडाच्या अधिकाऱ्यांकडे पुराव्यानिशी तक्रार दिल्याचेही सांगितले आहे. औरंगाबादच्या एका केंद्रातील सीसीटीव्ही फुटेजही दिले असून त्यात ५ फेब्रुवारी रोजी विद्यार्थी अनिल राठोड व सुपरवाइजर प्रवीण चव्हाण परीक्षा केंद्रात प्रवेश करताना दिसत आहेत. त्या दिवशी विद्यार्थ्यांची परीक्षा नसतानाही अनधिकृतरीत्या विद्यार्थ्याने प्रवेश केला आहे. परीक्षा केंद्राच्या आतमध्ये सुपरवायझर आणि विद्यार्थ्यांसोबत परीक्षा केंद्राचा मालक दिसून येत असून तिघे सीसीटीव्ही बंद करुन कॉम्प्युटरसोबत छेडछाड करताना दिसून येत आहेत. सीसीटीव्ही बंद केल्यानंतर त्यांनी सिस्टम सोबत छेडछाड करून सॉफ्टवेअर व त्यांना हवे ते बदल केल्याची शक्यता आहे. सुपरवाइजर प्रवीण चव्हाण व विद्यार्थी अनिल राठोड मित्र आहेत. तसेच औरंगाबाद टीव्ही सेंटर जवळील एका अभ्यासिकेत सोबत अभ्यासाला आहेत. या अभ्यासिकेचा मालक या स्कॅमचा मुख्य धागा असून त्याने त्याच्या या अभ्यासिकेतील 10 ते 12 विद्यार्थांना या परीक्षा केंद्रात अशा प्रकारे मदत केल्याची शक्यता कवठेकरने वर्तवली आहे.

फक्त टीसीएसच्या अधिकृत परीक्षा केंद्रातच परीक्षा घ्यावी, अशी आमची सुरुवातीपासूनच मागणी होती. आयओएन केंद्रासोबतच खासगी कॉम्प्युटर सेंटर व कॉलेज परीक्षा केंद्रे म्हणून दिल्याने हा सर्व घोटाळा झाला आहे. त्यामुळे किती खासगी कॉम्प्युटर सेंटर्स अशा प्रकारे मॅनेज झाले असतील ते सांगणे कठीण आहे. म्हाडाने जवळ-जवळ प्रत्येक जिल्ह्यात असे खासगी परीक्षा केंद्र दिली होती. त्यामुळे अंतिम निकाल लागण्याच्या आधी या प्रकरणाचा तपास होणे गरजेचे आहे. त्यांचे हार्ड डिस्क तात्काळ ताब्यात घेऊन या घोटाळ्याचा तपास करून दोषींवर गुन्हा दाखल करण्यात यावा, अशी मागणी एमपीएससी समन्वयक राहुल कवठेकर याने केली आहे.

हेही वाचा - Aluminium Body coaches : आता अॅल्युमिनियमनिर्मित पहिली मेट्रो ट्रेन पुण्याला दाखल होणार