.. तर आधी आर्थिक मदत द्या, महाराष्ट्र सलून व पार्लर असोसिएशनची सरकारकडे मागणी

सलून व्यावसायिकांबद्दल अद्याप कोणताही निर्णय न झाल्याने राज्य सरकारने सलून सुरू करण्यासंदर्भात नवी नियमावली तयार करावी अशी मागणी महाराष्ट्र सलून व पार्लर असोसिएशनचे अध्यक्ष सोमनाथ काशिद यांनी केली आहे.

पुणे - मागील अडीच महिन्यांपासून राज्यातील सलून बंद आहेत. राज्यातील सर्व व्यवसाय सुरू करण्यासाठी सरकारने परवानगी दिली. मात्र, सलून व्यावसायिकांबद्दल अद्याप कोणताही निर्णय न झाल्याने राज्य सरकारने सलून सुरू करण्यासंदर्भात नवी नियमावली तयार करावी, अशी मागणी महाराष्ट्र सलून व पार्लर असोसिएशनचे अध्यक्ष सोमनाथ काशिद यांनी केली आहे. संपूर्ण महाराष्ट्रात सलून व्यावसाय सशर्त चालू करण्यास परवानगी देण्याचे यामध्ये अंतर्भूत आहे. शासनाला सलून बंद ठेवायचे असल्यास सलून व्यवसायिकांना आर्थिक मदत देण्याची मागणी त्यांनी केलीय.

महाराष्ट्रात 15 लाख सलून व्यावसायिक आहेत. 15 लाख कुटुंब या व्यवसायावर अवलंबून आहेत. हे सर्व व्यावसायिक असंघटित आणि हातावर पोट अवलंबून असणारे आहेत. त्यामुळे सरकारने सलून व्यावसायिकांसाठी नवीन नियमावली जाहीर करून चालू करण्यास परवानगी द्यावी, असे काशिद यांनी सांगितले.

संघटनेच्या प्रमुख मागण्या - 1) दिल्ली तसेच उत्तरप्रदेश व कर्नाटक सरकारने दिलेल्या अर्थिक मदतीच्या पार्श्वभूमीवर महाराष्ट्रात सलून व पार्लर व्यावसायिकांना तत्काळ अर्थिक मदत द्यावी 2) केशकर्तन कामगारांचे बोर्ड कार्यान्वित करून निधी उपलब्ध करून द्यावा; तसेच अध्यक्ष निवडावा3) सहा महिन्यांचे दुकान भाडे व लाइट बिल माफ करण्यात यावे; तसा आदेश राज्य सरकारने काढावा4) पुढच्या नवीन नियमावलीत संपूर्ण महाराष्ट्रात सलून व्यावसाय सशर्त चालू करण्यास परवानगी द्यावी