पुणे - पूरपरिस्थितीमुळे आत्तापर्यंत एकूण 54 जणांचा मृत्यू झाला आहे. यामध्ये सांगलीतील 26, कोल्हापूर जिल्ह्यातील 10, साताऱ्यातील 8 तसेच पुणे जिल्ह्यातील 9 आणि सोलापुरातील एका व्यक्तीचा समावेश आहे. चार नागरिक अद्यापही बेपत्ता असून, पुराच्या फटक्याने आठ हजारहून अधिक जनावरे बेपत्ता आहेत. यामध्ये गाय आणि म्हैसवर्गीय 7 हजार 847 जनावरे, 1 हजार 65 शेळ्या-मेंढ्या तसेच 166 लहान वासरे व गाढवे बेपत्ता असल्याची माहिती विभागीय आयुक्त दिलीप म्हैसेकर यांनी दिली. खबरदारीचा उपाय म्हणून सांगली जिल्ह्यात अजूनही 8 बचाव पथके तैनात असल्याचे त्यांनी सांगितले.
पुराचा सर्वाधिक फटका बसलेल्या कोल्हापूर आणि सांगली जिल्ह्यातील पुराची स्थिती निवळली असून, जनजीवन पूर्वपदावर येत आहे. प्रशासनाच्यावतीने स्वच्छता, आरोग्य व पुनर्वसनाचे काम वेगाने सुरू आहे. पुणे विभागातील 33 हजार 775 पूरग्रस्त कुटुंबांना 16 कोटी 88 लाख 75 हजार रुपयांच्या रोख रकमेचे अनुदान म्हणून वाटप करण्यात आले आहे. पूरग्रस्त क्षेत्रातील पडझड झालेल्या घरांच्या सर्वेक्षणाचे काम सुरू असून, एकूण 1 हजार 169 घरांची पूर्णत: तर 18 हजार 533 घरांची अंशत: अशी मिळून 19 हजार 702 घरांची पडझड झाली आहे. तसेच सध्या शेती नुकसानीचे पंचनामे करण्याचे काम सुरू असल्याची माहिती विभागीय आयुक्तांनी दिली.
शासनाच्या निर्णयानुसार ग्रामीण भागातील प्रभावित कुटुंबांना 10 हजार तसेच शहरी कुटुंबांना 15 हजार रुपयांचे तत्काळ अनुदान देण्याचा निर्णय झाल्याचे डॉ. म्हैसेकर यांनी सांगितले आहे. यापैकी 5 हजार रुपये रोख स्वरुपात वाटण्याचे काम सुरु असून, उर्वरीत रक्कम कुटुंबीयांच्या खात्यावर जमा करण्यात येत आहे. आतापर्यंत पुणे विभागात 33 हजार 775 बाधित कुटुंबांना 16 कोटी 88 लाख 75 हजार रुपयांच्या रोखीचे वाटप करण्यात आले आहेत. यासोबत पुणे विभागातील 23 हजार 889 कुटुंबांना प्रत्येकी 2388.9 क्विंटल गहू व तांदुळ तसेच 10 हजार 251 लीटर केरोसिनचे वाटप करण्यात आल्याची माहिती विभागीय आयुक्तांनी दिली आहे.
