पुणे - वडगाव धायरी परिसरात पेट्रोलच्या रिकाम्या टँकरला आग लागल्याची घटना शनिवारी दुपारी घडली. वडगाव धायरी पुलावर डोंजेकडून लोणी काळभोरकडे हा टँकर निघाला होता. यावेळी अचानक टँकरमध्ये आग लागल्याचे निदर्शनास आले. त्यानंतर अग्निशमन दलाच्या जवानांनी ही आग विझवली असून आग कशामुळे लागली याचे कारण अद्याप समजू शकले नाही.
हेही वाचा - कुसेगाव येथील श्री.भानोबा देव यात्रेला सुरुवात; दर्शनासाठी भाविकांची गर्दी
रहदारी असलेल्या या पुलावर पेट्रोलच्या टँकरला आग लागल्याने एकच खळबळ उडाली होती. मात्र, टँकर रिकामा असल्याने परिसरातील नागरिकांनी सुटकेचा निश्वास टाकला. टँकरला आग लागल्यानंतर तातडीने अग्निशमन दलाच्या जवानांना पाचारण करण्यात आले. यानंतर अग्निशमन दलाच्या जवानांनी आगीवर नियंत्रण मिळवले. मात्र, पेट्रोलचा टँकर असल्याने खबरदारीचा उपाय म्हणून रस्त्यावरची वाहतूक काही काळ थांबवण्यात आली होती. तसेच परिसरातील नागरिकांनीही घटनास्थळी मोठी गर्दी केली होती. या टँकरला आग कशामुळे लागली याबाबत अद्याप समजू शकले नाही.
