पुणे - गावठी पिस्तुलासह जिवंत काडतुस बाळगणाऱ्या एका सराईत गुन्हेगाराला सांगवी पोलिसांनी अटक केली आहे. आश्विन आनंदराव चव्हाण (१९) असे गुन्हेगाराचे नाव असून, त्याच्यावर याआधीही अनेक गुन्हे दाखल असल्याची माहिती सांगवी पोलिसांनी दिली आहे.
हेही वाचा रावण टोळीतील दोन गुन्हेगारांना अटक; दोन पिस्तुलसह तीन जिवंत काडतुसे हस्तगत
पोलिसांनी दिलेल्या माहितीनुसार, सांगवी पोलीस ठाण्यातील काही कर्मचारी हे परिसरात खासगी वाहनाने गस्त घालत होते. त्यावेळी पोलीस कर्मचारी नितीन दांडगे यांना बातमीदारामार्फत आश्विन मयुरी नगरी येथील परिसरातील रस्त्यावर थांबला असल्याची माहिती मिळाली. त्याच्याजवळ एक गावठी पिस्तुल व जिवंत काडतुस असल्याची खात्री झाल्यानंतर पोलीस उपनिरीक्षक यशवंत साळुंके यांनी वरिष्ठ पोलीस निरीक्षक ज्ञानेश्वर साबळे यांच्या मार्गदर्शनाखाली एक टीम तयार करून आरोपीला बेड्या ठोकल्या.
पोलीस अद्याप अधिक तपास करत आहेत. संबंधित कारवाई वरिष्ठ पोलीस निरीक्षक ज्ञानेश्वर साबळे, अजय भोसले यांनी केली आहे.
