पणजी - नववर्षाच्या स्वागतासाठी गोवा सज्ज झाला आहे. राज्यातील समुद्र किनारे, कॅसिनो आणि हॉटेल्स 30 डिसेंबरपासून ओसंडून वाहत आहेत. 2021ला निरोप देऊन 2022च्या स्वागतासाठी गोव्यात लाखो पर्यटक दाखल होण्यास सुरुवात झाली आहे. दुसरीकडे राज्यात कोविडचा संसर्ग वाढत चालला आहे. पॉझिटिव्हिटीचा दर 1.8 टक्क्यांवरून वाढून तो 7.23 वर पोहोचला आहे.
गोव्यात 14 लाख देशी आणि विदेश पर्यटक दाखल झाले आहेत. सरत्या वर्षाला निरोप देऊन 2022चे स्वागत करण्यासाठी प्रत्येकजण सज्ज झाला आहे.
समुद्रकिनारे, कॅसिनो आणि हॉटेल्स फुल्ल -
गोव्याचे आकर्षक असणारे समुद्र किनारे आणि येथील निळाशार समुद्र ही गोव्याची ओळख आहे. याच समुद्रकिनारी येऊन नववर्ष साजरे करण्यासाठी अनेकजण तयार असतात. त्यामुळे कालपासून या समुद्रकिनारी पर्यटकांची तुफान गर्दी दिसून येत आहे. तसेच पर्यटकांच्या उत्साहाला चार चांद लावतात ते गोव्यातील कॅसिनो आणि हॉटेल्स. कालपासून कॅसिनो आणि हॉटेल्स फुल्ल झाले आहेत. हॉटेल्सचे दरही 25 ते 30 टक्क्यांनी वधारले आहेत. अनेक हॉटेल्स आणि कॅसिनोत नववर्ष स्वागतासाठी विविध ऑफर देण्यात आल्या आहेत. त्यामुळे समुद्रकिनाऱ्यावरील हॉटेल्स आणि समुद्रातील कॅसिनोना पर्यटकांची विशेष पसंती असणार आहे.
क्रूझ पार्टीला विशेष पसंती -
समुद्रात जाऊन डीजेच्या तालावर मद्यधुंद होऊन नाचत नववर्षाचे स्वागत करणे ही गोव्यातील पर्यटकांची परंपरा आहे. त्यामुळे क्रूझ आणि बोटीवरील इव्हेंटला लोकांची विशेष पसंती आहे. त्यामुळे अनेक लोक लाखो रुपये खर्च करून अशा पद्धतीने आपले नववर्ष गोव्यात साजरे करत आहेत. कालपासून या क्रूझ पार्टीना उत आला आहे. पार्टीमध्ये सध्या परदेशी मॉडेल्सला नाचविणे हे प्रतिष्ठेचे समजले जाते. त्यामुळे अनेक पार्टीमध्ये परदेशी मॉडेल्स नाचताना दिसत आहेत.
गोव्यात कोरोनाचा कहर-
राज्यात मागच्या चार दिवसांपासून कोविडचा संसर्ग वाढत ( Goa positivity rate ) चालला आहे. पॉझिटिव्हिटीचा दर 1.8 टक्क्यांवरून वाढून तो 7.23 वर पोहोचला आहे. नववर्ष स्वागताच्या उंबरठ्यावर कोविड नियम पायदळी तुडविण्यात येत आहे. राज्यात मागील काही दिवसांत प्रति दिवशी 100 च्या खाली असणारी कोविड बधितांची संख्या अचानकपणे वाढायला सुरुवात झाली आहे.
मागच्या तीन दिवसातील कोविड बधितांची संख्या ( Goa corona update )
गुरुवार - 30 डिसेंबर- 261, बुधवार- 29 डिसेंबर- 170, मंगळवार -28 डिसेंबर- 112
आरोग्यमंत्र्यांनी चिंता व्यक्त केली-
वाढत्या कोविड संसर्गाबद्दल आरोग्यमंत्री विश्वजित राणे यांनी चिंता व्यक्त केली आहे. तज्ज्ञ समितीने सरकारला योग्य ते मार्गदर्शन करण्याची गरज असल्याचे त्यांनी ट्विटरमध्ये म्हटले आहे. पर्यटकांकडून कोविड नियम पायदळीराज्यात येणाऱ्या पर्यटकांकडून कोविडच्या नियमांचे उल्लंघन होत आहे. राज्यात येणारे बहुतांश पर्यटक कोणत्याही कोविड नियमांचे पालन करत नसल्याचे चित्र दिसून येत आहे. हॉटेल्स, कॅसिनो तसेच क्रूझ बोटींवर सर्व नियमांना बगल देत बिनधास्तपणे गर्दी करत आहेत. दरम्यान नववर्ष आणि ख्रिसमसच्या पार्श्वभूमीवर सरकारने व विशेषतः पोलिसांनी नियम मोडणाऱ्यावर कडक कारवाई करण्याची मोहीम सुरू केली आहे.
