पणजी - गोव्यात लोकसभेच्या २ आणि विधानसभेच्या ३ जागांसाठी पोटनिवडणूक होत आहे. यामध्ये भाजपचा ५-० असा पराभव करणे, हेच आमचे लक्ष्य आहे. त्याला लोकांकडून चांगला प्रतिसाद मिळत आहे, असे विधान काँग्रेसचे उत्तर गोवा मतदारसंघाचे उमेदवार गिरीश चोडणकर यांनी केले.
काँग्रेस भवनात आयोजित करण्यात आलेल्या पत्रकार परिषदेत बोलताना चोडणकर म्हणाले, भाजपचा गोव्यातील जनतेशी संपर्क तुटला आहे. त्यामुळेच ते लोकशाहीला घातक निर्णय घेत आहेत. त्यामुळे भाजपने आयोजित केलेल्या प्रचारसभेत पंतप्रधान नरेंद्र मोदी यांनी गोव्यात खोटे बोलणाऱ्यांना धडा शिकवा, असे म्हटले आहे. गोव्यातील जनतेला येथे खोटे कोण बोलतो हे माहीत आहे. विविध समस्यांनी ग्रासलेल्या गोमंतकियांनी भाजपला पराभूत करण्याचा निर्णय घेतला आहे. आम्हाला अनेक भाजप कार्यकर्तेही प्रत्यक्ष-अप्रत्यक्ष मदत करत आहेत.
प्रचाराच्या निमित्ताने राज्यात फिरत असताना सर्वत्र बेरोजगारीची चिंता दिसून येत आहे. त्यामुळे इथल्या युवकांनी लोकसभेत जाण्याची मला संधी दिली तर गोव्यात असणाऱ्या केंद्र सरकारच्या विविध आस्थापनांमध्ये कोकणी भाषिकांना रोजगार कसा मिळेल, याचा पाठपुरावा करणार. यामुळे थोड्याफार प्रमाणात बेरोजगारी कमी होईल शिवाय त्याचे लाभ खऱ्या अर्थाने गोमंतकियांना मिळतील, यासाठी प्रयत्न करणार आहे, असेही चोडणकर यांनी सांगितले.
लोकसभेच्या २ जागा आणि विधानसभेच्या म्हापसा जागेसाठी महाराष्ट्रवादी गोमंतक पक्षाने जाहीर पाठिंबा दिल्याबद्दल चोडणकर यांनी मगोच्या केंद्रीय कार्यकारिणीचे आभार मानत सांगितले की, मगो पक्षनेत्यानी गोमंतकिय जनतेचा कल ओळखून योग्यवेळी राजकीय कृती केली आहे. भाजपला धडा शिकविण्यासाठी लोकभावनांशी केलेला खेळ, वाढती बेरोजगारी, अनैतिक राजकारण समजून घेतल्याबद्दल त्यांना धन्यवाद देत आहे. तसेच गोमंतकियांचा कल ओळखून आम आदमी पक्षाने काँग्रेस उमेदवारांना पाठिंबा द्यावा, असेही त्यांनी म्हटले.
वाळपईत लोकांकडून आम्हाला चांगला प्रतिसाद मिळत आहे, असे सांगून चोडणकर म्हणाले, विश्वजीत राणे यांचे कार्यकर्तेही भाजपकडून करण्यात आलेल्या राणे यांच्या अपमानाचा बदला घेण्याच्या तयारीत आहेत. कारण भाजपने मुख्यमंत्रीपदाच्या शर्यतीत असलेल्या राणे यांना उपमुख्यमंत्री अथवा पहिल्या ३ क्रमांकाच्या मंत्र्यांमध्येही स्थान दिलेले नाही. शिवाय काँग्रेसचे मतदारही आहेत. त्याचाही आम्हाला लाभ होणार आहे.
पणजीबाबत निवड समिती निर्णय घेणार
पणजी विधानसभेसाठी पोटनिवडणूक जाहीर झाली आहे. यासाठी काँग्रेस योग्य उमेदवार देणार आहे. याची निवड विरोधीपक्षनेते बाबू कवळेकर आणि विधीमंडळ समिती घेईल, असे चोडणकर यांनी सांगितले.
