गोमंतक मराठी साहित्य संमेलनातून पार्सेकरांना वगळल्याने वादंग

गोमंतक साहित्य सेवा मंडळाच्या वतीने पेडणे येथे 27 आणि 28 नोव्हेंबरला मराठी साहित्य संमेलनाचे आयोजन करण्यात आले आहे. या साहित्य संमेलनात माजी मुख्यमंत्री आणि प्राध्यापक लक्ष्मीकांत पार्सेकर यांना वगळण्यात आले आहे.

पणजी : राज्यात मराठी संस्कृतीला प्राधान्य देण्यासाठी अखिल भारतीय गोमंतक साहित्य सेवक मंडळाने 27 आणि 28 नोव्हेंबरला संत सोहीरोबनाथ शासकीय महाविद्यालयात राज्यस्तरीय मराठी साहित्य संमेलनाचे आयोजन केले आहे. संत साहित्याचे गाढे अभासक सदानंद मोरे या संमेलनाचे उद्घाटन करणार असून खासदार व केंद्रीय मंत्री श्रीपाद नाईक, मुख्यमंत्री डॉ प्रमोद सावंत, उपमुख्यमंत्री बाबू आजगावकर, आमदार दयानंद सोपटे ही राजकीय मंडळी कार्यक्रमाचे मुख्य अतिथी म्हणून सहभागी होणार आहेत. मात्र या कार्यक्रम पत्रिकेतून माजी मुख्यमंत्री आणि प्राध्यापक लक्ष्मीकांत पार्सेकर यांचे वगळल्याने नव्या वादाला तोंड फुटले आहे.

सोपटे आणि पार्सेकर वादामुळे वगळले?

\पेडणे तालुक्यातील मान्द्रे मतदारसंघ हा पार्सेकर यांचा मतदारसंघ. याच मतदारसंघातून पार्सेकर आमदार, आरोग्यमंत्री व पुढे राज्याचे मुख्यमंत्री झाले. 2017 ला पार्सेकर यांचा तत्कालीन काँग्रेस उमेदवार दयानंद सोपटे यांनी पराभव केला. पुढे 2019 ला सोपटे भाजपवासी झाले आणि पार्सेकर विरुद्ध सोपटे असा नवा संघर्ष उफाळून आला. विधानसभा निवडणुकीच्या पार्श्वभूमीवर हा वाद अधिकच तीव्र झालाय. त्यातच सोपटे कार्यक्रमाचे स्वागताध्यक्ष आहेत, म्हणूनच पार्सेकराना वगळण्यात आल्याची चर्चा आता होत आहे.

पार्सेकरांचा साहित्याशी संबंध नाही- आयोजक

लक्ष्मीकांत पार्सेकर हे माजी प्राध्यापक असून ते व्यवसायाने शिक्षक आणि राजकीय नेते आहेत. त्यातच त्यांची पेडणे तालुक्यात एक शिक्षण संस्था ही आहे. या कार्यक्रमात माजी केंद्रीय मंत्री रमाकांत खळप यांना एक चर्चासत्रात स्थान देण्यात आले. मात्र पार्सेकरांना वगळण्यात आल्याविषयी विचारले असता रमाकांत खळप हे साहित्यक आहेत, आणि राजकारणावर त्यांचा चांगला अभ्यास आहे. मात्र पार्सेकर यांचा साहित्याशी काहीही संबंध नसल्यामुळे त्यांना यात आमंत्रण देण्यात आले नाही असे आयोजकांनी सांगितले.