पणजी (गोवा) - गोवा मुक्तीसंग्रामची सुरुवात, गोव्यातील सर्वात हिंदुबहुल प्रदेश म्हणजे डिचोली ( Bicholim Assembly Constituency ). डिचोली तालुका हा खाणकामाच्या विळख्यात अडकलेला तालुका, वर्षानुवर्षे हा भाजपचा बालेकिल्ला राहिला आहे.
मतदारसंघातील राजकीय विद्यमान परिस्थिती
1994 नंतर या मतदारसंघात एकदाही काँग्रेसचा उमेदवार विजयी झालेला नाही. मगो किंवा भाजपचाच उमेदवार या मतदारसंघात विजयी झालेला आहे. 2017 च्या निवडणुकीत भाजप व मगो यांच्यात कडवी लढत झाली होती. मगोचे नरेश सावळ यांचा अवघ्या काही मतांनी पराभव करण्यात पाटणेकर यांना यश आले होते. यावेळीही राजेश पाटणेकर व मगोचे नरेश सावळ यांच्यात काटे की टक्कर होणार आहे. काँग्रेस पक्ष डिचोलीत बराच कमकुवत आहे. तसेच काँग्रेसकडे प्रभावशाली उमेदवारही नाही. मेघश्याम राऊत यांना काँग्रेसची उमेदवारी मिळण्याची शक्यता आहे.
2017 ची विधानसभा निवडणूक
2017 साली झालेल्या विधानसभा निवडणुकीत भाजप उमेदवार राजेश पाटनेकर यांचा विजय झाला आहे. त्यांनी महाराष्ट्र गोमंतक पक्षाचे उमेदवार नरेश सावळ यांचा पराभव केला. पाटनेकर यांना त्या निवडणुकीत 10 हजार 645 तर 9 हजार 988 मते मिळाली होती. सध्या या मतदारसंघाचे नेतृत्व आमदार तथा विधानसभा सभापती राजेश पाटनेकर हे करत आहेत.
मतदारसंघातील समस्या
मागच्या दोन ते तीन वर्षांपासून खाणकाम बंद असल्यामुळे बेरोजगारी ही येथील मुख्य समस्या आहे. खाणकाम बंद झाल्यामुळे त्यावर अवलंबून असलेले वाहतूक, जहाज बांधणी, खाणकामाची वाहतूक करणारे ट्रक यांना फार मोठा फटका बसला. यावर निगडीत सर्वच व्यवसाय बंद झाले व अनेक लोक बेरोजगार झाले. हा मतदारसंघ बहुतांशी ग्रामीण भागात असल्याने वीज आणि पाण्याची काहीशा समस्या ग्रामीण भागात आजही प्रकर्षाने जाणवतात.
मतदारसंघातील व्यवसाय
खाणकाम हा येथील मुख्य व्यवसाय आहे. पण, मागच्या काही दिवसांपासून तो बंद आहे. शेती, काजू, फळ बागायती व काजूची दारू बनविणे, भात शेती, पशुपालन, औद्योगिक वसाहत हे येथील महत्वाचे व्यवसाय आहेत.
मतदारसंघातील नोंदणीकृत मतदार
| पुरुष | महिला | एकूण |
| 11 हजार 800 | 12 हजार 94 | 23 हजार 894 |
आगामी विधानसभा निवडणुकीतील उमेदवार
| पक्ष | उमेदवार |
| भाजप | राजेश पाटनेकर |
| काँग्रेस | मेघश्याम राऊत |
| महाराष्ट्र गोमंतक पक्ष | नरेश सावळ |
हे ही वाचा - Goa Assembly Election 2022 : गोव्यात राष्ट्रवादी काँग्रेसला धक्का, आमदार चर्चिल आलेमाव तृणमूलमध्ये
