नाशिक - बंडखोर आमदार दादा भुसे शिंदे गटात दाखल झाल्याने शिवसेनेचा बुरुज ढासळला आहे. पक्षनिष्ठा पेक्षा त्यांनी मित्रप्रेमाला प्राधान्य देत शिंदे गटात दाखल झाल्याचं म्हटलं जात आहे. धर्मवीर चित्रपटातून दादा भुसे आणि एकनाथ शिंदे यांची मैत्री सर्वांसमोर आली. त्यात ठाणे येथील खासदार राजन विचारे हे भुसे यांचे व्याही आणि एकनाथ शिंदे यांचे तरुणपणाचे मित्र ( Dada Bhuse Join Eknath Shinde Group For Friendship ) आहेत.
भुसेंना शहरातून विरोध, मतदार संघातून समर्थन - मालेगाव व परिसरातील भुसे समर्थकांनी पाठिंब्यासाठी सोशल मीडियावर 'सदैव आपल्या सोबत', 'जिंदगी के साथ भी जिंदगी के बाद भी', 'जिथे तुम्ही तिथे आम्ही', 'एकच वादा ओन्ली दादा', असे स्टेटस ठेवले आहेत. मात्र, दुसरीकडे नाशिक शहरात दादा भुसेंना शिवसैनिकांचा प्रचंड विरोध दिसून आला. शिवसेना कार्यालयापासून बंडखोरांची तिरडी बांधून प्रतिकात्मक अंत्ययात्रा काढण्यात आली. 'गद्दारांना थारा नाही' अशा घोषणा देत नाशिकच्या शिवसैनिकांनी बंडखोर नेते दादा भुसे, आमदार सुहास कांदे यांचे फोटो लावून प्रतिकात्मक अंत्ययात्रा काढली आहे. तसेच, यापुढे गद्दारांना नाशिक जिल्ह्यात फिरू देणार नाही, असा इशाराही शिवसैनिकांनी दिला आहे.
संजय राऊत यांचे ट्विट - खासदार संजय राऊत यांनी ट्विटरच्या माध्यमातून भुसे यांच्यावर टीकास्त्र सोडले आहे. खरीप हंगामात कृषिमंत्री प्रत्येक आठवड्यात राज्यातील पेरणीचा आढावा घेत असतात. सध्या राज्यात पाऊस कमी आहे, तर भुसे आसाम येथे चिंतन शिबिरात जाऊन बसल्याने शेतकरी वाऱ्यावर आहे. मुख्यमंत्री कृपया आपण लक्ष द्या, असे ट्विट राऊत यांनी केलं होतं. तसेच मेलो तरी सेना सोडणार नाही, असे म्हणणारेच पळून गेल्याचे मुख्यमंत्री ठाकरे यांनी पदाधिकाऱ्यांच्या बैठकीत भुसे यांच्यावर नाव न घेता टीका केली होती.
हेही वाचा - Maharashtra Political Crisis : बंडखोरांना दिलासा, सर्वोच्च न्यायालयाची नरहरी झिरवळांना नोटीस
