नाशिक - जिल्ह्यातील ग्रामीण भागात बिबट्याने दहशत माजवली आहे. गाववस्तीत येत बिबट्यांचे नागरिकांवर आणि जनावरांवर हल्ले सुरू आहेत. यामुळे नाशिक परिसरात भितीचे वातावरण आहे. सामनगाव रोड परिसरात एक बिबट्याला जेरबंद करण्यात वनविभागाला यश मिळाले आहे, याची माहिती मिळताच परिसरातील नागरिकांनी बिबट्याला पाहण्यासाठी गर्दी केली होती.
पिंजऱ्यात काल (शनिवारी) रात्रीच्या सुमारास बिबट्या पिंजऱ्यात जेरबंद झाला. आज, रविवारी सकाळी ही बाब निर्दशनास आली. गेल्या २ महिन्यांपासून चाडेगाव सामनगाव रोड परिसरात ४-५ बिबट्यांनी ठाण माडला आहे. नाशिकच्या चाडेगाव शिवारात ह्याच महिन्याच्या १२ जून रोजी निशांत वाघ यांच्या शेतात बिबट्या पिंजऱ्यात जेरबंद झाला होता. या बिबट्याला जेरबंद करण्यासाठी मंगेश वाघ यांच्या शेतात वनविभागाने पिंजरा लावला होता. वनविभागाकडून या बिबट्याला ताब्यात घेण्यात आले आहे. तरीही परिसरात बिबट्या व पिल्ले असल्याचे नागरिकांकडून सांगण्यात आले आहे.
