नागपूर - शिवसेनेचे आमदार प्रताप सरनाईक यांनी मुख्यमंत्र्यांना लिहिलेल्या पत्रामुळे खळबळ उडाली आहे. पण, ते एकटे नाही तर सेनेतील 90 टक्के आमदार आणि खासदार हे सध्याच्या परिस्थितीत अस्वस्थ झाले आहेत. भाजपच्या पाठीत खंजीर खुपसल्याने तयार झालेली अस्वस्थता पत्रातून समोर आल्याचा दावा राज्याचे माजी मंत्री तथा भाजप नेते चंद्रशेखर बावनकुळे यांनी नागपुरात केला.
हेही वाचा - ओबीसी आरक्षणाचा तिढा सुटेपर्यंत सरकारने निवडणुका घेऊ नये - विजय वडेट्टीवार
शिवसेनेत अंतर्गत धुसफूस
राज्यात निवडणुका होत असताना देवेंद्र फडणवीस यांचा चेहरा दाखवून आमदार निवडून आणले. मोदी यांचा चेहरा समोर करून खासदार निवडून आणले. निवडणुकीच्या काळात प्रचार सभेमध्ये उद्धव ठाकरे यांनी देवेंद्र फडणवीस हेच मुख्यमंत्री असतील, असे अनेकदा बोलूनही दाखवले. मात्र, नंतर पाठीत खंजीर खुपसला. या बेईमानीमुळे अस्वस्थता निर्माण झाली आहे. भाजपच्या पाठीत खंजीर खुपसण्याचे परिणाम म्हणून शिवसेनेत अंतर्गत धुसफूस सुरू झाली. ती काशी थांबवावी, असा प्रश्न त्यांच्यासमोर आला आहे. यामुळे अजूनही वेळ गेली नाही, शिवसेनेने याचा विचार करावा, असे बावनकुळे म्हणाले.
शिवसेनेतील अनेकांची भाजपसोबत युती करण्याची इच्छा
खात्रीने सांगू शकतो की शिवसेनेतील अनेकांच्या मनात भाजपसोबत युती करण्याची इच्छा आहे. चार महिन्यांपूर्वी सांगायचे आम्ही युतीत आहोत, सोबत आहोत, नंतर मात्र दरवाजे बंद करत असेल तर जनता प्रश्न विचारणार आहे. एखाद्या व्यक्तीच्या बोलण्यावरून युती तोडून अशी भूमिका शिवसेना घेत असेल तर ते चुकीचे आहे, असे बावनकुळे म्हणाले.
सरनाईक यांच्या लेटर बॉम्बमुळे खदखद बाहेर
जनतेच्या मनात आज अनेक प्रश्न आहेत. विचार न पटलेल्या काँग्रेस किंवा राष्ट्रवादी काँग्रेस पक्षासोबत जाण्याची का वेळ आली? मातोश्रीचे दरवाजे का बंद झाले? असे अनेक प्रश्न आहेत. आता ही खदखद निर्माण झाली आहे. ही खदखद प्रताप सरनाईक यांच्या लेटर बॉम्बमुळे बाहेर आली आहे. यामुळे शिवसेनेला विचार मंथन करण्याची गरज आहे, असेही बावनकुळे म्हणाले.
हेही वाचा - नागपूर विशेष : कोरोनाच्या दोन्ही लाटांचा मोठा फटका; सलून 'स्टार्टअप' तोट्यात
