नागपूर - शहरातील लोकमान्य नगर ते सीताबर्डी मार्ग या मेट्रोच्या मार्गिकेचे उद्घाटन मंगळवारी करण्यात आले. राज्याचे मुख्यमंत्री उद्धव ठाकरे यांच्या हस्ते व्हिडिओ लिंकद्वारे 'माझी मेट्रो' या नागपूर मेट्रोच्या ११ किलोमीटर मार्गाचे लोकार्पण करण्यात आले. मात्र, यावेळी नागपूरचे पालकमंत्री आणि राज्याचे ऊर्जामंत्री नितिन राऊत हे चांगलेच नाराज झाले होते. त्यांनी आपली नाराजी भाषणा दरम्यान बोलून दाखवली.
नागपूर महामेट्रोच्या मार्गिकेच्या उदघाटन प्रसंगी वर्तमानपत्रांमध्ये पान भरून जाहिरात दिली. मात्र त्यात राज्यातील मंत्र्यांची नावे नव्हती. हा प्रकार लक्षात आल्याने नितीन राऊत यांनी स्पष्टपणे या संदर्भांत आपली नाराजी बोलून दाखवली. 'नागपुरचा असलेला सांस्कृतिक वारसा जपला गेला पाहिजे. विविध राजकीय पक्षांच्या नेत्यांनी नागपुरचा विकास व्हावा यासाठी संयुक्तिक प्रयत्न केले आहेत. त्यामुळे भविष्यात महामेट्रोने अशी चूक होणार नाही याची दक्षता घ्यावी', असे राऊत यांनी म्हटले.
हेही वाचा... माझी मेट्रो नागपूर : 'मला श्रेय नको तर, जनतेचे आशीर्वाद घ्यायचे आहे'
नागपूर मेट्रोचा पहिला फेज हा आठ हजार 600 कोटींचा प्रकल्प आहे. या प्रकल्पाचे काम शेवटच्या टप्यात आले आहे. मंगळवारी त्यातील एका मार्गिकेचे लोकार्पण करण्यात आले. त्यामुळे आता नागपुरात मेट्रोचे 25 किलोमीटरचे जाळे तयार झाले आहे. या मार्गिकेच्या उदघाटनाच्या निमित्ताने महामेट्रोकडून सर्व प्रमुख वर्तमानपत्रात पानभरून जाहिरात देण्यात आली. यामध्ये पंतप्रधान नरेंद्र मोदी, मुख्यमंत्री उद्धव ठाकरे, केंद्रीय मंत्री नितीन गडकरी आणि केंद्रीय नगर विकास मंत्री हरदीप सिह पुरी यांच्या व्यतिरिक्त दुसऱ्या कोणात्याही मंत्र्यांच्या नावाचा उल्लेख केला नव्हता. नागपूरचे पालकमंत्री असलेले नितीन राऊत यांचाही उल्लेख नव्हता.
हेही वाचा.... नियमांचे अन् वेळेचे पालन करा, पहिल्याच दिवशी मुंढेंच्या अधिकाऱ्यांना सूचना
