नागपूर : दिल्ली विद्यापीठाचे माजी प्राध्यापक जी. एन. साईबाबा यांनी तातडीने जामीन मिळावा यासाठी अर्ज केला आहे. आपल्या आईच्या अंतिम संस्काराला उपस्थित राहण्यासाठी त्यांनी हा अर्ज केला आहे. यासंदर्भात मुंबई उच्च न्यायालयाच्या नागपूर खंडपीठाने मंगळवारी राज्य सरकारला नोटीस पाठवली आहे.
साईबाबा हे सध्या नागपूर सेंट्रल जेलमध्ये आजीवन कारावास भोगत आहेत. माओवाद्यांशी संबंध असल्याप्रकरणी त्यांना ही शिक्षा झाली आहे. यापूर्वी गेल्या आठवड्यातही त्यांनी यासाठी अर्ज केला होता. मात्र, तो अर्ज फेटाळला गेला. त्यानंतर आता पुन्हा, अंतिम संस्कारानंतरच्या विधी पार पाडण्यासाठी त्यांनी अर्ज केला आहे. तसेच, याआधी त्यांची आणि त्यांच्या आईची व्हिडिओ कॉन्फरन्सिंगवर भेट घडवून देण्यासाठीही याचिका दाखल करण्यात आली होती, मात्र तीदेखील फेटाळण्यात आली होती.
यावर राज्य सरकारला नोटीस पाठवत उच्च न्यायालयाने १८ ऑगस्टपूर्वी उत्तर मागवले आहे.
सध्या व्हीलचेअरवर असलेले साईबाबा यांनी गेल्या महिन्यात उपचारांसाठी आणि आईला भेटण्यासाठी ४५ दिवसांचा जामीन मिळावा अशी मागणी केली होती. मात्र त्यांची ही मागणी फेटाळण्यात आली होती.
२०१७मध्ये साईबाबा आणि आणखी चार जणांना माओवाद्यांशी संबंध असल्याच्या गुन्ह्याखाली गडचिरोलीतील सेशन्स न्यायालयाने शिक्षा सुनावली होती. इतर चौघांमध्ये एक पत्रकार आणि जवाहरलाल नेहरू विद्यापीठाच्या एका विद्यार्थ्याचा समावेश होता. या सर्वांना यूएपीए कायद्यांतर्गत शिक्षा सुनावण्यात आली होती.
