नागपूर - संगणक शिकवणी वर्गात एका 18 वर्षीय विद्यार्थीनीच्या डोक्यावर मनोरुग्णाने हथोडा मारून तिला जखमी केल्याची घटना नागपूर शहरातील अजनी पोलीस ठाण्याच्या हद्दीत घडली आहे. या घटनेत ती विद्यार्थी किरकोळ जखमी झाली आहे. या प्रकरणी अजनी पोलिसांनी 35 वर्षीय मनोरुग्ण आरोपीला ताब्यात घेऊन त्याच्या आई वडिलांच्या स्वाधीन केले आहे. सध्या जखमीवर शासकीय वैद्यकीय महाविद्यालय व रुग्णालय (मेडिकल) मध्ये उपचार सुरू झाले आहेत.
18 वर्षीय विद्यार्थिनी मेडिकल चौकातील एका कम्प्युटर इन्स्टिट्यूटमध्ये शिकवणी वर्गात दाखल होताच मनोरुग्णाने मागून तिच्या डोक्यावर घाव घातला. सुदैवाने ती इन्स्टिट्यूटच्या पायऱ्या चढत असल्याने घाव जोरात लागला नाही. मुलीच्या ओरडण्याचा आवाज ऐकून इन्स्टिट्यूटसह शेजारचे लोक तिच्या मदतीसाठी धावले. त्यामुळेच आरोपी दुसरा वार करू शकला नाही. नागरिकांनी आरोपीला पोलिसांच्या स्वाधीन केले आहे.
आरोपी आईवडीलांच्या ताब्यात - या प्रकरणातील आरोपी हा मनोरुग्ण आहे. त्यामुळे पोलिसांनी त्याला उपचारासाठी आई वडिलांच्या ताब्यात दिले असल्याची माहिती अजनी पोलीस ठाण्याचे निरीक्षक सारीन दुर्गे यांनी दिली आहे. सध्या त्याच्यावर शासकीय रुग्णालयात उपचार सुरू आहेत.
मनोरुग्ण होता त्याच इन्स्टिट्यूटचा विद्यार्थी - या प्रकरणातील आरोपी मनोरुग्ण हा त्याच कम्प्युटर इन्स्टिट्यूटचा विद्यार्थी होता. त्यामुळे त्याला इन्स्टिट्यूटचा पत्ता लक्षात राहिल्याने तो तिथे दाखल झाला होता. मात्र, त्याने मुलीवर हातोडीने हल्ला का केला या बाबत खुलासा होऊ शकला नाही.
हेही वाचा - Hedgewar Smriti Bhavan Reiki Case : दहशतवादी रईस अहमद शेखचा कश्मीर ते नागपूर रेकी प्रवास, कोणी केली मदत?
