मुंबई - युरोपिय देशातील एखाद्या आभासी चित्रपटात अनेक चमत्कारीक आणि अकल्पीत अशा अनेक घटना नजरेसमोर आणून उभ्या केल्या जातात, आणि त्या सत्य असल्याचे भासविले जाते. आभासी चित्र खरे वाटते. असाच काहीसा अनुभव रविवारी, २३ जानेवारी रोजी आयआयटी मुंबईच्या दीक्षांत सोहळ्यात मिळणार आहे. आयआयटी मुंबईने विविध तंत्रज्ञानाचा वापर करत जगातील पहिला असा आभासी दीक्षांत सोहळा आयोजित करण्याची तयारी केली आहे. यासाठी आयआयटीतील प्राध्यापकांच्या एका चमूने आभासी कॅम्पसचे एक विश्वच साकारले असल्याने हा सोहळा मोठा मनोरंजक आणि आदर्श ठरण्याची शक्यता आहे.
रविवारी, २३ ऑगस्टला आयआयटी मुंबईतील हा सोहळा ‘आभासी वास्तव’ आणि ‘कृत्रिम बुद्धीमत्ता’ याचा वापर करून विद्यार्थ्यांना घरबसल्या अनुभव घेता येणार असून यासाठीची सर्व सुविधा उपलब्ध करून देण्यात आली असल्याची माहिती आयआयटी मुंबईकडून देण्यात आली. पहिलाच आभासी दीक्षांत सोहळा असून त्यातून मिळणाऱ्या आनंदापासून वंचित राहू नये, यासाठी संस्थेतील प्राध्यापक दीपक चौधरी यांनी त्यांच्या २० जणांच्या चमूसह एक आभासी विश्व साकारले आहे. ज्यातून विद्यार्थ्यांना ते प्रत्यक्ष दीक्षांत समारंभात आहे असाच आभास अनुभवता येणार आहे.
काय आहे आभासी कॅम्पसचे विश्व?
आयआयटीतील प्राध्यापक पराग चौधरी यांनी आभासी कॅम्पस तयार केला आहे. ज्यात विद्यार्थ्यांचे गप्पांचे ठिकाण, प्रयोगशाळा, हॉस्टेल्सचा समावेश आहे. विद्यार्थी तेथे आपल्या मित्रांसह एकावेळी भेटू शकणार आहेत. यासाठी शनिवारी संध्याकाळी ६ वाजल्यापासून विद्यार्थी या आभासी विश्वात आपल्या मित्रांशी गप्पा मारू शकणार आहेत. तसेच आपल्या प्राध्यापकांशीही संवाद साधू शकणार आहे. तर हे तंत्रज्ञान विकसित करण्यासाठी २० जणांच्या चमूने सुमारे पाच हजार तासांपेक्षा जास्त कालावधी काम केल्याचे प्रा. शुभाषिश चौधरी यांनी सांगितले.
हेही वाचा - मेट्रो 3 मधील 29 वे ब्रेक थ्रू यशस्वी; मिठी नदीखालील 1.5 किमीचे भुयारीकरण पूर्ण
नाव पुकारताच विद्यार्थी स्क्रीनवर दिसू शकेल..
या आभासी कॅम्पसमध्ये पदवी घेण्यासाठी ज्यात विद्यार्थ्यांचे नाव पुकारले की, तो विद्यार्थी त्याच्या मोबाइलच्या किंवा लॅपटॉपच्या स्क्रीनवर दीक्षांत समारंभाच्या पोषाखात दिसू लागेल व तो थेट आयआयटीच्या दीक्षांत सभागृहात प्रवेश करेल. तेथे मान्यवर पाहुण्यांच्या हस्ते तो पदवी स्वीकारेल असे सर्व त्याला दिसेल. अशा प्रकारचा भारतातच नव्हे तर जगातील पहिलाच दीक्षांत सोहळा असल्याचे प्रा. सुभाषिश चौधरी यांनी सांगितले.
नोबेल विजेते प्रा.डंकन हॅल्डेन आणि स्टिफन शेवार्झमनचे मार्गदर्शन..
कार्यक्रम २३ ऑगस्टला दुपारी १.३० वाजल्यापासून सुरू होणार आहे. यावेळी नोबेल पारितोषिक विजेते प्राध्यापक डंकन हॅल्डेन आणि स्टिफन शेवार्झमन हे विद्यार्थ्यांना मार्गदर्शन करण्यासाठी उपस्थित राहणार आहेत. हा कार्यक्रम सह्याद्री वाहिनीसोबतच आयआयटी मुंबईचे यूट्युब चॅनेल आणि फेसबुक लाईव्ह आणि इतर सोशल मीडियावरही पाहता येणार आहे. तसेच दीक्षांत समारंभाच्या दिवशी आभासी वास्तव तंत्रज्ञानाच्या साह्याने एक अ‌ॅप तयार करण्यात येणार असल्याचे सांगण्यात आले.
हेही वाचा - सरकार व आदित्य ठाकरेंचे नाव खराब करण्याचा विरोधकांचा प्रयत्न - अनिल परब
