मुंबई - राज्यसभेच्या निवडणुकीत मतदान करण्यासाठी मुंबईत आलेले शिवसेना खासदार ओम निंबाळकर यांच्या गाडीवर झाड कोसळले आहे. यामुळे त्यांच्या गाडीचे नुकसान झाले आहे. झाड कोसळले तेव्हा गाडीत कोणीही नव्हते यामुळे सुदैवाने जीवितहानी झालेली नाही.
खासदारांच्या गाडीवर झाड कोसळले - मुंबईत शुक्रवारी, शनिवारी व रविवारी पाऊस झाला. याचवेळी राज्यसभेसाठी मतदान होते. मतदान प्रक्रियेत भाग घेण्यासाठी उस्मानाबाद येथील शिवसेनेचे खासदार ओम निंबाळकर मुंबईत आले होते. ते आकाशवाणी आमदार निवासात उतरले होते. त्यांनी आपली गाडी याच परिसरात पार्क केली होती. पावसा दरम्यान या परिसरात झाडे पडली. त्यापैकी एक झाड खासदार निंबाळकर यांच्या गाडीवर पडले. वाहनाचे मोठे नुकसान झाले. ही दुर्घटना घडली तेव्हा गाडीत कोणीही नव्हते.
१४ हजार झाडांची छाटणी बाकी - मुंबईत एकूण २९ लाख ७५ हजार २८३ झाडे आहेत. मुंबईत रस्त्यालगत १ लाख ९२ हजार ५५९ एवढी झाडे असून त्यातील १ लाख ५४ हजार १९३ झाडांचे सर्वेक्षण करण्यात आले. त्यात १ लाख ०४ हजार ७० झाडांच्या धोकादायक फांद्यांची छाटणी करण्याची गरज असल्याचा अहवाल बनवण्यात आला. त्यानुसार ९० हजार झाडे आणि त्यांच्या फांद्या तोडण्यात आल्या असल्या तरी अद्याप सुमारे १४ हजार झाडे रस्त्याच्या कडेला उभी आहेत. रस्त्यालगतच्या सर्व्हे करण्यात आलेल्या झाडांमध्ये ५२३ झाडे ही मृत अवस्थेत आढळून आली होती, त्यातील ५१२ झाडे तोडण्यात आली आहेत.
हेही वाचा - APMC Market Rate : एपीएमसी मार्केटमध्ये पालेभाज्या कडाडल्या; वाटाणा, पावटा, तोंडली, फरसबीचे दरही वाढले
