मुंबई - शहरातील तापमान वाढल्याने प्रचंड उकाडा जाणवत आहे. यामुळे मान्सून कधी दाखल होणार याची प्रतिक्षा आहे. या सर्वांसाठी खुशखबर म्हणजे एक जूनला केरळमध्ये मान्सून दाखल होणार असल्याची माहिती भारतीय हवामान विभागाने दिली आहे. तसेच जून, जुलै, ऑगस्ट, सप्टेंबरमध्ये या चार महिन्यात चांगला पाऊस पडेल, असा अंदाज हवामान खात्याने वर्तवला आहे.
सर्वात पहिला मान्सून केरळमध्ये दाखल होतो. त्यानंतर पाच ते सहा दिवसानंतर महाराष्ट्र दाखल होतो. 10 जूनपर्यंत मान्सून तळकोकणासह मुंबईत दाखल होईल. 15 ते 20 जून दरम्यान उर्वरित महाराष्ट्र मान्सून हजेरी लावेल. यंदा नैऋत्य मॉन्सून सामान्यच्या 98 टक्के राहील, असा अंदाज हवामान विभागाकडून वर्तविण्यात आला आहे. गेल्या दोन वर्षात अरबी समुद्रातील वादळामुळे महाराष्ट्रात मान्सून लांबणीवर पडला होता. मात्र यंदा अशी कोणतीही शक्यता नाही. त्यामुळे केरळात जर मान्सून वेळेवर दाखल झाला तर महाराष्ट्रातही वेळेवर दाखल होण्याचा अंदाज आहे.
पृथ्वी विज्ञान मंत्रालयाचे सचिव डॉ. माधवन राजीवन यांनी ट्वीटमध्ये लिहिले आहे की, "यंदा मान्सून वेळ म्हणजेच 1 जून रोजी दाखल होईल, असा अंदाज हवामान विभागाने वर्तवला आहे. हा प्रारंभिक अंदाज आहे. भारतीय हवामान विभाग 15 मे आणि 31 मे रोजी पावसाचा अधिकृत अंदाज वर्तवणार आहे. देशात नैऋत्य मोसमी वाऱ्यांमुळे मान्सूनचा प्रवेश होतो. केरळमध्ये सर्वप्रथम मान्सूनचे आगमन होते. केरळमध्ये दरवर्षी १२० दिवसांच्या पावसाळ्यामध्ये सरासरी २०४.९ सेंटीमीटर मान्सूनची नोंद व्हायची. पण गेल्या वर्षी केरळमध्ये सरासरीच्या तब्बल ९ सेंटीमीटर अधिक म्हणजेच २२२.७९ सेंटीमीटर इतका पाऊस पडला.
मान्सून जरी वेळेवर दाखल होणार असला तरी अवकाळी पावसाने शेतकऱ्यांची चिंता वाढवलेली आहे. पुढील तीन दिवस काही भागात भागात ढगाळ वातावरण राहणार आहे. तसेच विजेच्या कडकडाटासह मध्य स्वरूपाचा पाऊस पडण्याची शक्यता हवामान विभागाने वर्तवली आहे.
