मुंबई - कोरोनाचा प्रादुर्भाव असल्याने महापालिकेकडून त्याचा प्रसार रोखण्याचे काम केले जात आहे. कोरोनावर लस शोधण्याचे काम सुरु असून त्याचा रुग्णांवर होणाऱ्या परिणामावर अभ्यास सुरु आहे. युके येथील ऑक्सफोर्ड विद्यापीठ आणि पुण्याच्या सिरम इन्स्टिट्यूटने बनवलेल्या 'कोविशिल्ड' लसीचा रुग्णांवर काय परिणाम होतो याचा अभ्यास आजपासून पालिकेच्या केईएम रुग्णालयातून केला जाणार असल्याची माहिती रुग्णालयाचे डीन डॉ. हेमंत देशमुख यांनी दिली.
कोरोनाचा जगभरात प्रसार झाला आहे. कोरोनाला रोखण्यासाठी लस शोधण्याचे काम सुरु आहे. युके येथील ऑक्सफर्ड व पुण्याच्या सिरम इन्स्टिट्यूटने बनवलेल्या 'कोवीशिल्ड' लसीचा रुग्णांवर दुष्परिणाम झाल्याने चाचणी थांबविण्याचा निर्णय घेण्यात आला होता. मात्र त्रुटी दूर झाल्यानंतर ड्रग कंट्रोलर जनरल ऑफ इंडियाच्या मान्यतेनंतर मुंबईत महापालिकेच्या केईएम आणि नायर रुग्णालयात या लसीचा रुग्णांवर काय परिणाम होतो याचा अभ्यास केला जाणार आहे. केईएम रुग्णालयात करण्यात येणाऱ्या चाचण्यांना एथिक समितीची मंजुरी मिळाल्याने आजपासून चाचण्या केल्या जाणार असल्याचे डॉ. देशमुख यांनी सांगितले.
कोरोना लसीच्या चाचणीत सहभागी होणाऱ्या स्वयंसेवकांसाठी दोन प्रकारचे आरोग्य विमा काढण्यात आले आहेत. त्यात १६० व्यक्तींचा १० कोटींचा समूह विमा आहे. तसेच, सहभागी व्यक्तींच्या औषधांच्या बिलांसाठी प्रत्येक व्यक्तीचा ३५ लाख रुपयांचा विमा काढण्यात आला आहे. लसीच्या चाचणीदरम्यान या व्यक्तींवर काही दुष्परिणाम झाल्यास या विम्याचा लाभ मिळेल. केईएम रुग्णालयात ३५० पेक्षा जास्त व्यक्तींनी नोंदणी केली आहे. त्यापैकी आरोग्यदृष्ट्या योग्य असलेल्या १०० व्यक्तींना लस देण्यात येईल. चाचणीच्या सुरुवातीच्या प्रक्रियेत या व्यक्तींची आरटीपीसीआर व वैद्यकीय चाचणी करण्यात येईल. त्यानंतर चाचणीदरम्यान चार महिन्यांच्या कालावधीत प्रत्येकाला तीन डोस देण्यात येतील असे डॉ. देशमुख यांनी सांगितले.
हेही वाचा : लवकरच होणार 'कोविशिल्ड'ची तिसऱ्या टप्प्यातील चाचणी; ससून रुग्णालयात नावनोंदणी सुरू
