राजीव गांधींच्या नावाने पुरस्कार, राज्य सरकारचे केंद्र सरकारला जशास तसे उत्तर

दिवंगत पंतप्रधान राजीव गांधी यांच्या नावाने खेळातील सर्वोच्च पुरस्कार 'राजीव गांधी खेलरत्न पुरस्कार' दिला जात होता. मात्र तो पुरस्कार आता 'मेजर ध्यानचंद खेलरत्न पुरस्कार' या नावाने दिला जाणार आहे. त्यानंतर राज्य सरकारने लगेच आयटी क्षेत्रामध्ये उल्लेखनीय काम करणार्‍या संस्थांना राजीव गांधी यांच्या नावाने पुरस्कार देण्यात येणार आहे.

मुंबई - दिवंगत पंतप्रधान राजीव गांधी यांच्या नावाने खेळातील सर्वोच्च पुरस्कार 'राजीव गांधी खेलरत्न पुरस्कार' दिला जात होता. मात्र तो पुरस्कार आता 'मेजर ध्यानचंद खेलरत्न पुरस्कार' या नावाने दिला जाणार आहे. त्यानंतर राज्य सरकारने लगेच आयटी क्षेत्रामध्ये उल्लेखनीय काम करणार्‍या संस्थांना राजीव गांधी यांच्या नावाने पुरस्कार देणार असल्याचे जाहीर करून केंद्र सरकारला जशास तसे उत्तर दिले असल्याचे मत राजकीय विश्लेषकांकडून मांडण्यात येत आहे.

पंतप्रधान नरेंद्र मोदी यांनी 'राजीव गांधी खेलरत्न पुरस्कार'चे नाव बदलून 'मेजर ध्यानचंद खेलरत्न पुरस्कार' ठेवले असल्याचे जाहीर केले. त्यानंतर पंतप्रधान नरेंद्र मोदी यांच्या या निर्णयावर काँग्रेस नेत्यांकडून टीका करण्यात आली. पण आता राज्यातील महाविकास आघाडी सरकारने माहिती व तंत्रज्ञान क्षेत्रात उल्लेखनीय काम करणाऱ्या संस्था किंवा व्यक्तींना दिवंगत राजीव गांधी यांच्या नावाने पुरस्कार देणार असल्याची घोषणा केली आहे. हा पुरस्कार देण्याबाबत शासन निर्णय देखील राज्य सरकारने जारी केलेला आहे. तत्कालीन पंतप्रधान राजीव गांधी यांनी पंतप्रधान असताना देशांमध्ये माहिती प्रसारण तंत्रज्ञान व विज्ञान तंत्रज्ञान क्षेत्रामध्ये मोठी क्रांती घडवून आणली होती. त्यामुळे राजीव गांधी स्मृती दिनानिमित्त माहिती व तंत्रज्ञान क्षेत्रामध्ये उल्लेखनीय कामगिरी करणाऱ्यांना हा पुरस्कार देण्यात यावा याबाबत निर्णय घेण्यात आला आहे. 20 ऑगस्ट 2021 रोजी या पुरस्काराची घोषणा करून 30 ऑक्टोबर 2019 पूर्वी संस्था निवडीचे निकष व चयन महाराष्ट्र तंत्रज्ञान व माहिती महामंडळामार्फत पुरस्कार देण्यात यावा असे शासन आदेशात सांगण्यात आले आहे. 20 ऑगस्ट रोजी या पुरस्काराचे स्वरूप आणि निकष याबाबत राज्य सरकारकडून स्पष्ट केला जाणार आहे.

राज्याचे केंद्राला जशास तसे उत्तर -

पंतप्रधान नरेंद्र मोदी यांनी 'राजीव गांधी खेलरत्न पुरस्कारा'चे नाव बदलून 'मेजर ध्यानचंद खेलरत्न पुरस्कार' असे नाव ठेवण्यात आले. त्यानंतर राज्य सरकारने माहिती व तंत्रज्ञान क्षेत्रात उल्लेखनीय काम करणार्‍या संस्थेला राजीव गांधी यांच्या नावाने पुरस्कार दिला जाणार असल्याची घोषणा केली आहे. ही घोषणा म्हणजे राज्य सरकारचे केंद्र सरकारला दिलेले जशास तसं उत्तर असल्याचे मत राजकीय विश्लेषक अजय वैद्य यांनी व्यक्त केले आहे.

राजीव गांधी यांचे नाव संपवण्याचा प्रयत्न -

देशात तंत्रज्ञान क्रांती घडवण्याचे काम माजी पंतप्रधान राजीव गांधी यांनी केले. आज ज्या टेक्नॉलॉजीचा उपयोग करून भारतीय जनता पक्ष जास्तीत जास्त लोकांपर्यंत पोहोचण्याचा प्रयत्न करत आहे, ती टेक्नॉलॉजी देखील राजीव गांधी यांच्या प्रयत्नामुळे देशात विकसित झाली असल्याचा टोला मुंबईचे पालकमंत्री अस्लम शेख यांनी लगावला आहे. केंद्र सरकार राजीव गांधी यांचे नाव संपवण्याचा प्रयत्न करत आहे. मात्र पंतप्रधान राजीव गांधी यांचे नाव कधीही संपणार नाही. देशातील प्रत्येक नागरिकांच्या मनात राजीव गांधी यांच्याबद्दल आस्था आहे. त्यामुळे विरोधकांनी कितीही प्रयत्न केला तरी राजीव गांधी यांचे नाव संपवू शकत नाहीत, असा इशाराही अस्लम शेख यांनी प्रसारमाध्यमांशी बोलताना दिला.

आयटी क्षेत्रात राजीव गांधी यांचे महत्त्वाचे योगदान -

देशात कम्प्यूटर आणण्याचे काम पंतप्रधान असताना राजीव गांधी यांनी केले. त्यावेळी विरोधी पक्षांनी याचा मोठा विरोध केला होता. देशातील रोजगार संपून जाईल, अशा प्रकारचा आरोपही राजीव गांधी यांच्यावर त्यावेळी विरोधकांनी केला होता. मात्र त्याचं तंत्रज्ञानाने देशात लाखो नोकरीची संधी उपलब्ध करून दिली. त्यामुळेच माहिती व तंत्रज्ञान क्षेत्रातील उल्लेखनीय काम करणार्‍या संस्था किंवा व्यक्तींना राजीव गांधी यांच्या नावाने पुरस्कार देण्याचा निर्णय राज्य सरकारने घेतला असल्याचे अल्पसंख्यांक मंत्री नवाब मलिक यांनी सांगितले.

राजीव गांधी यांच्या नावाने पुरस्कार दिला जात असेल तर स्वागत, पण..

दिवंगत पंतप्रधान राजीव गांधी यांच्या नावाने माहिती व तंत्रज्ञान क्षेत्रामध्ये पुरस्कार दिला जात असेल तर, त्याचे स्वागत सर्वच पक्षांनी केलं पाहिजे असं भारतीय जनता पक्षाचे आमदार राम कदम म्हणाले आहेत. राज्य सरकारच्या या निर्णयाचे स्वागत केलं त्यांनी केले. मात्र खेळ रत्न पुरस्कार मेजर ध्यानचंद यांचे नाव ज्यावेळेस देण्यात आले त्यावेळी शिवसेनेने राजकारण करत असल्याचा आरोप केंद्र सरकारवर केला होता.

राजीव गांधी यांच्या नावाने असलेला खेलरत्न पुरस्काराचे नाव बदलल्यानंतर लगेच राज्य सरकारकडून नव्या पुरस्काराची घोषणा केली जाते. या वेळेवर राम कदम यांनी बोट ठेवलं आहे. तसेच बाळासाहेब ठाकरे यांनी नेहमीच काँग्रेसच्या नेत्यांचा विरोध केला. मात्र आता महाविकास आघाडी सरकारमध्ये असताना शिवसेना काँग्रेसनेते त्यांच्या नावाने पुरस्कार देण्यासाठी तयार होत असल्याची खरमरीत टीकाही राम कदम यांच्याकडून करण्यात आली आहे.