मुंबई - विधानसभा निवडणूक शेवटच्या टप्प्यात आहे. मतदारसंघात कोण बाजी मारणार? कोणाला मात मिळणार याची जोरदार चर्चा सुरू आहे. त्यातून काही विद्यमान मंत्र्यांना ही निवडणूक अवघड जाण्याची शक्यता आहे. तर, काही ज्येष्ठ नेत्यांनाही निवडून येण्यासाठी मोठी कसरत करावी लागणार आहे.
हेही वाचा - 'टेंडरसाठी बायको विकणारी औलाद' राजेंद्र राऊतांची जीभ घसरली
पंकजा मुंडे
सरकारमध्ये ग्रामविकास मंत्री म्हणून पंकजा मुंडे काम करत आहेत. त्या परळी मतदारसंघातून निवडणूक लढवत आहेत. त्यांच्या समोर या मतदारसंघात विरोधी पक्षनेते आणि त्यांचे बंधू धनंजय मुंडे यांनी मोठे आव्हान उभे केले आहे. येथे जोरदार लढत होत आहे. त्यात पंकजा मुंडे यांना ही निवडणूक अवघड जाणार अशी चिन्हे आहेत.
राम शिंदे
जलसंधारण मंत्री म्हणून राम शिंदे हे सरकारमध्ये जबाबदारी सांभाळत आहेत. कर्जत जामखेड मतदारसंघात ते प्रतिनिधीत्व करतात. यावेळीही ते या मतदारसंघातून निवडणूक लढवत आहेत. ते सलग दोनवेळा निवडून आले आहेत. मात्र, विजयाची हॅट्ट्रिक त्यांना सोपी नाही. राष्ट्रवादी काँग्रेसचे रोहित पवार यांनी त्यांच्या समोर मोठे आव्हान उभे केले आहे. पवार यांनी मतदारसंघात चांगली बांधणी केली आहे. त्यामुळे शिंदे यांना हॅट्ट्रिक साधणे अवघड जाईल अशी चर्चा मतदारसंघात आहे.
आशिष शेलार
वांद्रे पश्चिम मतदारसंघातून आशिष शेलार निवडणूक लढत आहेत. शेवटच्या टप्प्यात त्यांचा मंत्रीमंडळात समावेश करण्यात आला. मात्र, यावेळची निवडणूक त्यांच्यासाठी सोपी नाही. त्यांच्या समोर काँग्रेस उमेदवार असिफ झकेरीया यांनी मोठे आव्हान उभे केले आहे. मुस्लीम मतदार या मतदारसंघात निर्णायक भूमिका बजावतात. या आधीही या मतदारसंघातून बाबा सिद्धीकी यांनी बाजी मारली आहे. त्याची पुनर्रावृत्ती झकेरीयांकडून होण्याची शक्यता आहे.
हेही वाचा - नागपूरचं बोचकं परत नागपूरला पाठवा, अमोल कोल्हेंचा मुख्यमंत्र्यांना टोला
जयदत्त क्षीरसागर
बीड मतदारसंघातून शिवसेनेचे मंत्री जयदत्त क्षीरसागर आपले नशीब अजमावत आहेत. मात्र, यावेळी त्यांना त्यांच्या पुतण्यानेच संदिप क्षीरसागर यांनी राष्ट्रवादीकडून आव्हान उभे केले आहे. त्यामुळे सहज जिंकणारे क्षीरसागर यांना यावेळी थोडी जास्त मेहनत घ्यावी लागणार आहे.
परिणय फुके
परिणय फुके हे सरकारमध्ये राज्यमंत्री आहेत. त्यांना काँग्रेस नेते नाना पटोले यांच्या विरोधात साकोली मतदारसंघातून उतरवण्यात आले आहे. त्यांच्या विजयाचा मार्ग सुकर नसल्याचे मतदारसंघात बोलले जात आहे.
हेही वाचा - स्मिता पाटील यांच्या नावामागचं रहस्य ते त्यांची शेवटची इच्छा, अशी आहे कथा
"हे" नेते ही अडचणीत?
मंत्र्यांबरोबरच काही ज्येष्ठ नेत्यांनाही निवडून येण्यास अडचणी येवू शकतात. त्यात माजी मुख्यमंत्री पृथ्वीराज चव्हाण यांचा समावेश आहे. त्यांच्या समोर डॉ. अतूल भोसलेंचे कडवे आव्हान आहे. फुलंब्रीतून विधानसभा अध्यक्ष हरिभाऊ बागडे निवडणूक लढवत आहेत. त्यांना ही निवडणूक सोपी नाही. काँग्रेसच्या कल्याण काळेंना गेल्या वेळी येथून निसटता पराभव सहन करावा लागला होता. बारामतीमधून गोपिचंद पडळकर यांना तर बळीचा बकरा बनवल्याची चर्चा भाजपमध्येच आहे. औसामधून मुख्यमंत्र्यांचे स्विय सहाय्यक अभिमन्यू पवार यांची प्रतिष्ठा पणाला लागली आहे. काँग्रेसच्या बसवराज पाटलांचे कडवे आव्हान त्यांच्या समोर आहे.
