ईटीव्ही भारत विशेष : इंधन दरवाढीचा जनसामान्यांना फटका, सार्वजनिक वाहतूक सुरू करण्याची मागणी

एकीकडे टाळेबंदीच्या काळात सार्वजनिक वाहतूक सामान्य नागरिकांसाठी बंद आहे. मात्र, इंधन दरवाढीचा वेग कायम असल्याने सामान्य नागरीक दुहेरी संकटात सापडला आहे. यातच शहरात सार्वजनिक वाहतूक सुरू करावी, अशी मागणी जोर धरत आहे.

मुंबई - एकीकडे टाळेबंदीच्या काळात सार्वजनिक वाहतूक सामान्य नागरिकांसाठी बंद आहे. मात्र, इंधन दरवाढीचा वेग कायम असल्याने सामान्य नागरिक दुहेरी संकटात सापडला आहे. यातच शहरात सार्वजनिक वाहतूक सुरू करावी, अशी मागणी जोर धरत आहे.

कोरोना व लॉकडाऊनमुळे सर्वांना आर्थिक झळ सोसावी लागत आहे. त्यातच इंधन वाढीमुळे सर्वसामान्यांच्या खिशाला देखील ग्रहण लागलंय. पेट्रोल-डिझेलच्या किंमतीत मागील महिनाभरापासून वाढ होतं आहे. सध्या मुंबईत सार्वजनिक वाहनांची सुविधा देखील नाही. अनलॉक - १.० सुरू झाल्यापासून सरकारी आणि काही खासगी कार्यालये सुरू करण्यास परवानगी देण्यात आली. मात्र, त्या तुलनेत प्रवासी वाहतूक वाढवण्यात आलेली नाही. याचा त्रास मुंबईकरांना सोसावा लागतोय. परिवहन बसेसची संख्यादेखील कमी असल्याने चाकरमान्यांना खासगी वाहनातून प्रवास करावा लागत आहे.

इंधन दरवाढीमुळे ते मेटाकुटीला आले आहेत. सध्या कोणताही पर्याय नसल्याने वाढीव दर सहन करण्याव्यतिरिक्त पर्याय नसल्याचे मुंबईकर सांगत आहेत.

संचारबंदीतील नियामांच्या शिथिलीकरणानंतर मुंबईरांसाठी प्रवास तापदायक झाला आहे. बेस्ट सेवा केवळ अत्यावश्यक सेवा देणाऱ्या कर्मचाऱ्यांसाठीच उपलब्ध आहेत. अपुऱ्या सुविधेमुळे मुंबईत विविध बसथांब्यांवर प्रवाशांच्या रांगा लागल्याचे पाहायला मिळते. त्यातच रिक्षा आणि टॅक्सीत बसणाऱ्या प्रवाशांच्या संख्येवर निर्बंध आलेत. चारऐवजी केवळ दोनच प्रवासी टॅक्सीत बसू शकतात. त्याचबरोबर पोलिसांच्या बंदोबस्तात सामन्यांचे हाल होत आहेत. अनेक ठिकाणी तपासणी नाक्यांवर वाहनांच्या रांगा लागलेल्या दिसतात.

आवश्यक प्रमाणपत्र आणि इतर बाबींसाठी खासगी वाहनांना पोलिसांच्या कारवाईला सामोरे जावे लागत आहे. आतापर्यंत सुमारे 18 हजार खासगी वाहनांवर कारवाई करण्यात आली आहे. याचा गैरफायदा टॅक्सी व रिक्षाचालक उचलत असून अवाजवी भाडे आकारले जात आहे.

संचारबंदी शिथिल करताना राज्य सरकारने सरकारी कार्यालयांना १० टक्के आणि खासगी 15 टक्के कर्मचारी उपस्थितीसह काम सुरू करण्यास परवानगी दिली आहे. मात्र, सरकारने मुंबई आणि मुंबई बाहेरून येणाऱ्या कर्मचाऱ्यांचा कोणताही विचार केलेला दिसत नसल्याची तक्रार मुंबईकरांनी केलीय.

पेट्रोल डिझेलचे भाव गगनाला

मुंबईत पेट्रोल 88 रुपये तर डिझेल 79 रुपये लिटर आहे. गेल्या दीड महिन्यांपासून आतापर्यंत पेट्रोल आणि डिझेलच्या किंमतीत अनुक्रमे पेट्रोल 9.18 रुपयांनी तर डिझेल 11.66 रुपयांनी वाढ झाली आहे. त्यामुळे सर्वसामन्यांचं बजेट कोलमडलंय.

मुंबई महापालिकेच्या बेस्ट परिवहन उपक्रमाच्या 50 टक्के बसगाड्या अत्यावश्यक सेवेसाठी चालवण्यात आल्या आहेत. बेस्टच्या बहुतांश बसगाड्यांचे मार्ग रेल्वेस्थानक परिसराकडे जातात. मात्र, सध्या रेल्वे बंद असल्याने या बसचा कोणताही फायदा प्रवाशांना होत नाही. यामुळे मोठ्या प्रमाणात हाल होत आहेत, असे काही मुंबईकर 'ईटीव्ही भारत'शी बोलताना म्हणाले. एकूणच इंधन दरवाढीमुळे खासगी वाहनांचा वापर करताना दुहेरी अडचणींचा सामना समान्यांना करावा लागतोय.