मुंबई - शनिवारी काश्मीरच्या हंदवाडा क्षेत्रात दहशतवाद्यांसोबत झालेल्या चकमकीत भारतीय लष्कराचे कमांडिंग ऑफिसर कर्नल शर्मा यांच्यासह पाच जवान हुतात्मा झाले. या जवानांवर काल अंत्यसंस्कार करणार आले. या पार्श्वभूमीवर सामना संपादकीयतून कोरोनाशी लढताना आपण प्रत्यक्ष युद्धभूमीवर काय चालले आहे, याकडे कानाडोळा केल्याचे म्हटले आहे. तसेच, ज्याप्रमाणे देशातील डॉक्टर्स, नर्सेस, पोलीस हे कोरोना योद्धे आहेत, असे सांगत पंतप्रधान मोदींनी या कोरोना योद्ध्यांवर फुले बरसण्यासाठी सैन्याच्या तिन्ही दलांना मैदानात आणि आकाशात उतरवले. तसेच 'या सर्व शहिदांच्या कुटुंबावरही कोणी तरी फुले उधळा हो, त्यांना मानवंदना देण्यासाठीही बॅण्ड वाजवा, पणत्या-मेणबत्त्या पेटवा. या पाच जवानांच्या हौतात्म्याचा बदला घेण्यासाठीही एखादा सर्जिकल स्ट्राइक गाजावाजा न करता होऊ द्या' असे म्हटले आहे.
प्रत्यक्ष युद्धभूमीवर कानाडोळा झाला...
सारा देश कोरोनाशी युद्ध लढत आहे व हे युद्ध आणखी किती काळ चालेल ते सांगता येत नाही. या गडबडीत प्रत्यक्ष युद्धभूमीवर काय चालले आहे? त्याकडे आपला कानाडोळा झाला आहे. हा कानाडोळा शनिवारी बहुधा सैल झाला असावा. कश्मीरच्या सीमेवर दहशतवाद्यांच्या कुरापती आणि हल्ले वाढले आहेत. उत्तर कश्मीरमधील हंदवाडा क्षेत्रात शनिवारी रात्री दहशतवाद्यांबरोबर चकमक झाली त्यात हिंदुस्थानचे मोठे नुकसान झाले आहे. कर्नल आशुतोष शर्मा यांच्यासह पाच जवानांचे बलिदान झाले असून हा सर्व प्रकार धक्कादायक आहे, असे सामनातून सांगण्यात आले आहे.
देशात जे हिंदू-मुसलमान असा राजकीय खेळ करत आहेत, त्यांनी काझींचे बलिदान विसरु नये...
कोरोना संकटाच्या काळात अहोरात्र कर्तव्य बजावणार्‍या कोरोना योद्ध्यांना मानवंदना देण्यासाठी आपल्या लढाऊ विमानांनी, हेलिकॉप्टर्सनी आकाशातून या ‘कोरोना योद्ध्यां’वर पुष्पवृष्टी केली. काही ठिकाणी लष्कराच्या बॅण्ड पथकानेही मानवंदना दिली. पायदळ व नौदलानेही या मानवंदना सोहोळ्यात भाग घेतला. पण त्याचवेळी कश्मीरात पाकड्या अतिरेक्यांबरोबर चकमक सुरू होती. यात कर्नल आशुतोष शर्मा व त्यांचे चार सहकारी हुतात्मा झाले. या पाचही वीरांनी देशासाठी सर्वोच्च बलिदान केले आहे. त्यातील एका वीराचे नाव सबइन्स्पेक्टर एस. ए. काझी असे आहे. सध्या देशात जे हिंदू-मुसलमान असा राजकीय खेळ करीत आहेत त्यांनी कर्नल शर्मा यांच्या खांद्यास खांदा लावून पाकड्यांशी लढताना हौतात्म्य पत्करलेल्या काझी यांचे बलिदान विसरू नये, असे सामनातून सुनावण्यात आले आहे.
हेही वाचा... टाळेबंदीची कडक अंमलबजावणी करा, मे अखेरपर्यंत राज्य ग्रीन झोनमध्ये हवे - मुख्यमंत्री ठाकरे
काश्मीरातील शांतता म्हणजे भूगर्भातली खदखद...
कश्मीरातील 370 कलम वगैरे हटवल्यापासून तेथे ‘लॉक डाऊन’ सुरूच होते. लोकांच्या मुक्त स्वातंत्र्यावर बंधने लादून शांतता प्रस्थापित करण्याचा प्रयत्न झाला, पण ही शांतता म्हणजे भूगर्भातली खदखद ठरताना दिसत आहे. ‘लॉक डाऊन’ काळात कश्मिरात घुसखोरांनी हल्ले केलेच. शनिवारी रात्री अशाच एका हल्ल्यात कर्नल शर्मा यांचे जे बलिदान झाले हे त्याचेच प्रमाण आहे, अशी टीका सानमनातून करण्यात आली.
हौतात्म्यांचा बदला घेण्यासाठीही एखादा सर्जिकल स्ट्राइक होऊ द्या...
काश्मीरमध्ये हुतात्मा झालेल्या कर्नलसह पाच जवानांना सर्व देशवासीयांनी आदरांजली वाहीली. मात्र, या सर्व शहिदांच्या कुटुंबावरही कोणी तरी फुले उधळा हो! त्यांना मानवंदना देण्यासाठीही बॅण्ड वाजवा, पणत्या-मेणबत्त्या पेटवा. या पाच जवानांच्या हौतात्म्याचा बदला घेण्यासाठीही एखादा सर्जिकल स्ट्राइक गाजावाजा न करता होऊ द्या, असे सामनातून केंद्राला म्हटले आहे.
दिल्लीत एक प्रखर राष्ट्रवादी देशभक्त वगैरे सरकार असताना 'हे' घडत आहे..
काश्मीरमध्ये एकाच वेळी आमचे पाच शूर जवान मारले जातात हे चांगले लक्षण नाही. आमच्याच भूमीवर आमचे जवान वारंवार मारले जातात. दिल्लीत एक मजबूत आणि प्रखर राष्ट्रवादी देशभक्त वगैरे सरकार असताना हे घडत आहे. कोरोनाशी युद्ध व त्यातील योद्ध्यांना मानवंदना सुरूच राहील, पण कश्मीरमध्ये दुर्लक्ष होऊन चालणार नाही. 370 कलम काढले, कश्मीरचे तुकडे केले याबद्दल वाहवा झाली. पंतप्रधान मोदी व गृहमंत्री शहांचे मजबूत इरादे पक्के होते म्हणून ते झाले हे मान्य करावेच लागेल, पण आपल्या जवानांचे बलिदान थांबलेले नाही व सैन्याचे सामुदायिक शिरकाण सुरूच राहिले, अशा शब्दात सामनातून केंद्रावर ताशेरे ओढण्यात आले आहेत.
कोरोना योद्धय़ांवर फुलांची उधळण होत असताना कश्मीरची जमीन जवानांच्या रक्ताने भिजली...
कश्मीरमध्ये शहीद होणार्‍या जवानांना श्रद्धांजल्या वाहून आणि उसासे सोडून काय होणार? हंदवाडाच्या लष्करी तळावर कर्नल शर्मा यांच्यासह पाच वीर जवानांचे मृतदेह तिरंग्यात गुंडाळून ठेवले. हे छायाचित्र प्रत्येक देशवासीयाला वेदना देणारे आहे. ‘जय हिंद’चा नारा घशातच गुदमरून टाकणारे हे दृष्य आहे. कोरोना योद्धय़ांवर हिंदुस्थानी लष्कर आकाशातून फुलांची उधळण करीत असताना कश्मीरची जमीन कर्नल शर्मा यांच्यासह पाच वीर जवानांच्या रक्ताने भिजली आहे. हे चित्र चांगले नाही, अशी भावना सामनातून व्यक्त करण्यात आली आहे.
