"एकटे लढणार आणि जिंकणार ही खुमखुमी चांगलीच जिरली"

वर्षभरापूर्वी 105 आमदार येऊनही सत्ता गेली. तेव्हापासून महाराष्ट्र भाजपास सुतक लागले. कालच्या नागपूर-पुण्यातील पराभवाने आणखी एक सुतक लागले. एका वर्षात दोनदा सुतक लागणे हे हिंदू शास्त्रानुसार चांगले नाही. भाजपला काहीतरी तोड करावीच लागेल.

मुंबई - विधान परिषद निवडणूक निकालात महाविकास आघाडीची सरशी झाली. त्यानंतर सामनातून भाजपला डिवचण्याची संधी शिवसेनेने सोडली नाही. आम्ही एकटे लढलो म्हणून हरलो. असे चंद्रकांत पाटील म्हणतात. ते खरे आहे, पण आम्ही सर्वशक्तिमान आहोत व एकटेच लढणार व जिंकणार ही खुमखुमी त्यांचीच होती. ती चांगलीच जिरली आहे. असे म्हणत शिवसेनेने भाजप आणि त्यातून चंद्रकांत पाटलांना टोला हाणला आहे.

भाजपने धडा घ्यावा

काँग्रेस, राष्ट्रवादी व शिवसेनेची महाविकास आघाडी एकत्र लढली यापेक्षा एकदिलाने लढली हे महत्त्वाचे. भाजप-शिवसेना एकत्र लढत होते तेव्हा शिवसेनेची टांग खेचण्यासाठी जागोजागी गुप्त बंडखोर उभे करून भाजप खेळ बिघडवत होता, असा आरोपही आग्रलेखातून करण्यात आला आहे. आता तिघात तसे झाले नाही. यापासून धडा घ्यायचा आहे तो भाजपने, असा सल्लाही ही देण्यात आला आहे.

ही तर बदललेल्या वादळी वाऱ्याची चाहूल

नागपूर व पुण्यातील भाजपचा पराभव ही बदललेल्या वादळी वाऱ्याची चाहूल आहे. वाऱयाने एक दिशा पकडली आहे व राज्यातील साचलेला, कुजलेला पालापाचोळा उडून जाणार आहे. नागपुरातील पराभव धक्कादायक आहे, तितकाच पुण्यातील पराभवही भाजपसाठी ‘आत्मक्लेश’ करून घ्यावा असाच आहे.

...तर मग ईव्हीएम घोटाळय़ातून ओरबाडलेल्या विजयास कौल म्हणायचे काय?